Doping namunasida kokain izlari topilgan bokschi Tayson Fyuri barcha chempionlik kamarlaridan mahrum etilishi mumkin

Boks bo‘yicha superog‘ir vazn toifasida WBA va WBO versiyalari bo‘yicha jahon chempioni hisoblangan britaniyalik Tayson Fyurining kokain giyohvand moddasini aniqlash bo‘yicha topshirgan doping testi ijobiy natija berdi. Bu haqda “TASS” xabar bermoqda .

Foto: EPA

Tayson Fyurining doping namunasi 22-sentabr kuni olingan edi. Britaniyalik sportchi barcha chempionlik kamarlaridan mahrum etilishi mumkin.
Avvalroq 29-oktabr kuniga belgilangan ukrainalik Vladimir Klichko va Tayson Fyuri o‘rtasidagi revansh jangi tashkilotchilari bellashuv noma’lum muddatga qoldirilganini tasdiqlagan edi.
Bokschilar o‘rtasidagi jang qoldirilishining rasmiy sababi sifatida Fyurining jarohati ko‘rsatilgan, ammo keyinroq OAV britanliyalik bokschi ruhiy muammolarga duch kelganini ma’lum qilgan edi.
Eslatib o‘tamiz, 2015-yilning noyabr oyida Tayson Fyuri 12 raundlik jangda Vladimir Klichkoni hakamlarning yakdil qarori bilan mag‘lubiyatga uchratib , IBF, WBA va WBO chempionlik kamarlarini qo‘lga kiritgandi.
Keyinroq britaniyalik bokschi majburiy jang o‘tkazishdan bosh tortgani uchun IBF kamaridan mahrum etilgan edi .
Tayson Fyuri professional ringda 25 ta jang o‘tkazib, barchasida (18 ta jangda nokaut bilan) g‘alaba qozongan. Vladimir Klichko 68 ta jangning 64 tasida (53 ta jangda nokaut bilan) zafar quchib, 4 marta mag‘lubiyatga uchragan.
Batafsil | Подробно | Read more... Daryo