Shotlandiyalik bokschining o‘limidan so‘ng britaniyalik deputat boks qoidalarini o‘zgartirishni talab qildi

Britaniyalik deputat Pol Flinn shotlandiyalik bokschi Mayk Touellning o‘limidan so‘ng boks qoidalarini o‘zgartirishni talab qildi. Bu haqda, The Guardian nashriga tayanib, “TASS” xabar bermoqda .

Mayk Touell (chapda). Foto: Getty

29-sentabr kuni Deyl Evansga qarshi jangning beshinchi raundida Mayk Touell nokautga uchradi. U zambilda olib chiqildi va shifoxonaga yetkazildi. Biroz vaqt o‘tib, 25 yoshli bokschi bosh miya jarohatlari oqibatida  vafot etdi .
“Biz bir nechta sport turining qoidalarini o‘zgartirib, bosh — inson tanasining mo‘rt qismi ekanini tushunib yetishimiz kerak. Vazifamiz — sportchilarni himoya qilib, zarbalar oqibatida kelib chiqadigan bosh jarohatlarini kamaytirish. Boksning asosiy maqsadi raqibni xushsiz holatga keltirish bo‘lib qoldi”, — dedi deputat.
O‘z navbatida, Buyuk Britaniyaning Headway xayriya tashkiloti boksni umuman bekor qilish talabi bilan chiqdi.
“U (Mayk Touell) yosh ota edi va uning asosiy e’tibori oilasini qo‘llab-quvvatlashga qaratilishi kerak edi. Muammo ochiqligicha qolmoqda — boks bekor qilinishidan avval yana necha kishi qurbon bo‘lishi kerak? Boks ruxsat berilgan sport turlari ro‘yxatida qolar ekan, ko‘plab yosh insonlar hayotdan ko‘z yumadi yoki jarohatlar tufayli og‘ir kasalliklarga chalinadi”, — dedi Headway rahbari.
Buyuk Britaniya tibbiyot assotsiatsiyasi va Butunjahon tibbiyot uyushmasi ham boksning bekor qilinishini qo‘llab-quvvatladi.
“Bosh miya jarohatlarining bir necha turi mavjud. Shulardan birida qon kichik miqdorda miyaga quyiladi va ma’lum vaqt mobaynida o‘limga olib keladi”, — ma’lum qildi Butunjahon tibbiyot uyushmasi bosh kotibi.
Ma’lumot uchun, Deyl Evansga qarshi jang oldidan Mayk Touell professional ringda 12 jang o‘tkazib, 11 g‘alaba va 1 durangni qayd etgandi.
Batafsil | Подробно | Read more... Daryo