O‘zbekiston Prezidenti saylovini o‘tkazuvchi 3-Buxoro okrug saylov komissiyasining majlisi bo‘lib o‘tdi

O‘zbekiston Respublikasi Prezidenti saylovini o‘tkazuvchi 3-Buxoro okrug saylov komissiyasining majlisi bo‘lib o‘tdi, deb yozadi O‘zA.

Foto: “Fikr.uz”

Komissiya a’zolari va ommaviy axborot vositalari xodimlari ishtirok etgan majlisda okrug hududida saylov uchastkalari tuzish to‘g‘risidagi masala muhokama qilindi.
Majlisda saylovlar mamlakatda huquqiy demokratik davlat va kuchli fuqarolik jamiyati barpo etish, iqtisodiy taraqqiyot hamda xalq kelajagini belgilashda muhim ahamiyatga ega ekani, O‘zbekiston Respublikasi Prezidenti saylovining oshkoralik, tenglik va adolat tamoyillari asosida o‘tishi uchun xalqaro andazalarga mos mustahkam milliy qonunchilik asosi yaratilgani ta’kidlandi.
– Bunday siyosiy tadbirlarning har jihatdan yuqori saviyada tashkil etilishi saylov uchastkalari faoliyati samarali yo‘lga qo‘yilishi bilan bog‘liq, – deydi 3-Buxoro okrug saylov komissiyasi raisi M.Daminov. – “O‘zbekiston Respublikasi Prezidenti saylovi to‘g‘risida”gi qonunning 10- va 11- moddalariga muvofiq, shahar, tuman hokimliklari va harbiy qismlar komandirlarining saylov uchastkalarini tuzish to‘g‘risidagi taqdimnomalari ko‘rib chiqildi. Shunga asosan, okrug hududida 500 saylov uchastkasi tuzildi va ularning tartib raqami, chegarasi va manzili ko‘rsatilgan ro‘yxati tasdiqlandi. Okrug saylov komissiyasining bu haqdagi tegishli qarori matbuotda e’lon qilinadi.
Majlisda saylov uchastkalarida komissiya a’zolarining to‘laqonli faoliyat yuritishi uchun tegishli sharoitlar yaratish, jumladan, mebel jihozlari, komputer, aloqa vositalari bilan ta’minlash, ona va bola, tibbiy xizmat xonasini jihozlash masalalari ham muhokama qilindi.
O‘zbekiston Respublikasi Prezidenti saylovini yoritish bo‘yicha viloyat matbuot markazining nizomi, ish rejasini tasdiqlash, jurnalistlarni akkreditatsiyadan o‘tkazish va okrug saylov komissiyasi vakolatiga kiruvchi boshqa tegishli masalalar bo‘yicha qarorlar qabul qilindi. Ommaviy axborot vositalari xodimlari uchun brifing tashkil etildi.
Batafsil | Подробно | Read more... Daryo