Shanxayda O‘zbekiston Prezidenti sayloviga bag‘ishlangan brifing bo‘lib o‘tdi

Shanxay Xalqaro tadqiqotlar universiteti huzuridagi Markaziy Osiyo mamlakatlari tadqiqotlari markazida 4-dekabr kuni O‘zbekistonda o‘tkaziladigan prezidentlik sayloviga bag‘ishlangan brifing bo‘lib o‘tdi. Bu haqda “Jahon” xabar bermoqda .

Foto: “Jahon”

Tadbirda Xitoy ekspert-akademik doiralari vakillari, shu jumladan, Shanxay Xalqaro tadqiqotlar universiteti O‘zbek tili kafedrasining mutaxassislari ishtirok etdi.
Brifing chog‘ida uning ishtirokchilari O‘zbekistonda saylovlarni o‘tkazish bo‘yicha faol saylovoldi kampaniyasi boshlangani, kuzatuvchilarning bu jarayondagi ishtiroki, siyosiy partiyalar tomonidan davlat rahbari lavozimiga ilgari surilgan nomzodlar haqidagi ma’lumotlar bilan yaqindan tanishib chiqdi.
“2014–2015-yillari O‘zbekistonda bo‘lib o‘tgan parlament va prezident saylovlariga universitetimizdan vakil bo‘lib borgan ekspertlar saylov jarayoni yuqori darajada tashkil qilinganiga hamda saylovlar umume’tirof etilgan xalqaro me’yorlarga to‘la muvofiq ravishda o‘tganiga shaxsan guvoh bo‘lib qaytgan edi. O‘zbekistonda navbatdagi saylovlar ham shaffoflik muhitida o‘tishiga, barcha nomzodlar uchun teng sharoitlar yaratilishiga ishonchim komil”, — dedi Shanxay Xalqaro tadqiqotlar universiteti partiya qo‘mitasi kotibi Szyan Fen.
“O‘zbekistonda mustaqil rivojlanish yillari mobaynida katta o‘zgarishlar ro‘y berdi. Mamlakatda iqtisodiy o‘sishning izchil sur’atlari va makroiqtisodiy barqarorlik kuzatilmoqda. Shahar va qishloqlarni obodonlashtirish, zamonaviylashtirish bo‘yicha keng ko‘lamli ishlar amalga oshirilmoqda, bir-biridan chiroyli inshootlar barpo etilmoqda. Har qanday rivojlangan demokratik davlatda bo‘lgani singari O‘zbekistonda ham oldinda turgan saylovlarda barcha siyosiy partiyalarning ishtiroki ta’minlanmoqda. O‘z-o‘zidan ayonki, bu safar ham saylovoldi kampaniyasida OAV orqali targ‘ibоt-tashviqot ishlari olib borilishida barcha nomzodlar teng imkoniyatlardan foydalanadi. Jumladan, mamlakatning ijtimoiy-siyosiy va ijtimoiy-iqtisodiy rivojlanishi masalalari yuzasidan o‘z qarashlari ifoda etilgan dasturlarni elektoratga yetkazish uchun nomzodlarga hajmiga ko‘ra bir xil bo‘lgan efir vaqti va nashr maydonini berish yo‘li bilan teng sharoitlar ta’minlanadi. O‘tgan saylovlardagi ovoz berish chog‘ida fuqarolar yuqori darajada faol ishtirok etgani respublika ahlining o‘z mamlakati davlatchiligi yanada mustahkamlanishi va kuchli parlamentarizm instituti shakllanishiga hissa qo‘shishga hamda  tizimli o‘zgarishlar amalga oshirilishini qo‘llab-quvvatlashga bo‘lgan intilishini namoyon etdi. Saylovlar muvaffaqiyatli o‘tishiga tilakdoshman”, — dedi Markaziy Osiyo mamlakatlari tadqiqotlari markazi direktorining o‘rinbosari Yan Bo “Jahon” bilan suhbat chog‘ida.
Batafsil | Подробно | Read more... Daryo