Samarqandda erkin iqtisodiy zona tashkil etiladi

Urgut tumanida erkin iqtisodiy zona tashkil etiladi. Ushbu tashabbusni O‘zbekiston Prezidenti vazifasini bajaruvchi Shavkat Mirziyoyev viloyatga tashrifi chog‘ida ilgari surdi, deb xabar beradi “Gazeta.uz”.

Urgut bozori. Foto: “Orexca.com”

Ayni paytda Urgut tumanidagi 42 gektar maydonni egallaydigan sanoat zonasida 40 ta sanoat korxonasi, shu jumladan, 19 ta qo‘shma korxona faoliyat yuritmoqda. Ushbu korxonalarda 1200 kishi ishlamoqda.
O‘tgan yili ushbu korxonalar 157,5 milliard so‘mlik 20 ming turdagi sanoat mahsulotlarini ishlab chiqardi, eksport hajmi 10 million dollardan oshdi.
Sanoat zonasida gilamlar va gilam mahsulotlari, sintetik tola, elektr duxovkalar, gaz plitalari, bir martalik plastik idishlar, polimer yelimi va boshqa mahsulotlar chiqariladi.
2017-yilda Urgutda sanoat mahsuloti ishlab chiqarish bo‘yicha 78 loyihani amalga oshirib, 3400 ish o‘rni yaratish ko‘zda tutilgan.
Bugungi kunda O‘zbekistonda uchta iqtisodiy zona faoliyat yuritmoqda — 2008-yilda tashkil etilgan “Navoiy” industrial-iqtisodiy zonasi (Navoiy viloyati), 2012-yilda tashkil etilgan “Angren” maxsus industrial zonasi (Toshkent viloyati), 2013-yilda tashkil etilgan “Jizzax” maxsus industrial zonasi (Jizzax viloyati) hamda uning Sirdaryo viloyatidagi filiali.
Batafsil | Подробно | Read more... Daryo