Minskda Donbassdagi kuchlarni qaytarish to‘g‘risida kelishuvga erishildi

Minskda uch tomonlama aloqalar guruhi Donetsk viloyatining Petrovskiy aholi punktida 7-oktabr, juma kuni kuchlarni qaytarish to‘g‘risida kelishuvga erishdi. Bu haqda Donetsk ayirmachilari vakili Denis Pushilinning matbuot kotibi Viktoriya Talakina ma’lum qildi, deya xabar beradi “Korrespondent.net”.

Foto: Getty Images

“Uzoq va qizg‘in bahslardan so‘ng tomonlar, bunga mone’lik qiladigan holatlar bo‘lmagan taqdirda, Petrovskiy aholi punktida 7-oktabr, juma kuni kuchlar va vositalarni qaytarish to‘g‘risida bir to‘xtamga keldi”, — deya ta’kidladi Talakina.
Uch tomonlama aloqalar guruhidagi Ukraina vakili Leonid Kuchmaning matbuot kotibi Darya Olifer mazkur ma’lumotni tasdiqladi va Lugansk qishlog‘i aholi punktida kuchlarning qaytarilishi 9-oktabrga mo‘ljallanganini bildirdi.
Ma’lumot uchun, 21-sentabr kuni Minskda Donbassdagi kuchlarni qaytarish haqidagi hujjat imzolandi. Unda Zolotoye, Petrovskiy va Lugansk qishlog‘i aholi punktlarida 3 ta xavfsizlik hududini tashkil etish ko‘zda tutilgan.
Batafsil | Подробно | Read more... Daryo