Karlush Keyrush: Biz O‘zbekistonga zarba berish imkonini bermadik va zafar quchdik

O‘zbekiston va Eron milliy terma jamoalari o‘rtasidagi 6-oktabr kuni bo‘lib o‘tgan JCh—2018 saralashi doirasidagi o‘yindan keyin forslar ustozi Karlush Keyrush o‘z fikrlarini bildirib o‘tdi, deb yozdi “Championat.asia”.

Foto: CA

“O‘zbekiston to‘pni asosan maydonning o‘ziga tegishli qismida egallab turdi va uni hujum chizig‘iga uzatishga urindi. Biz esa gol urdik va g‘alabaga erishdik”, — deb gap boshladi portugaliyalik mutaxassis.
U Sardor Azmun, Ashkan Dejaga, Alirizo Jahonbahsh kabi yetakchi futbolchilarning boshlang‘ich tarkibiga kiritilmaganini taktik qaror ekani bilan izohladi. Keyinroq esa Azmun va Jahonbahshning zaxiradan qo‘shilib, o‘yinda yaxshi ishtirok etganini tushuntirdi.
“O‘zbekistonning o‘yini qovushmaganida Eronning hissasi katta bo‘ldi. Suriya va Qatarga qarshi O‘zbekistonning o‘yinlarini ko‘rib, raqibni o‘rganib chiqqandim. Biz ularga zarba berish imkonini bermadik va zafar quchdik. Eron termasi futbolchilarini tabriklayman”, — dedi Keyrush.
Jurnalistning O‘zbekistonga qarshi Keyrush boshqaruvida bo‘lib o‘tgan uchta bellashuvdan qaysi biri forslar uchun qiyinroq bo‘lgani haqidagi savoliga mutaxassis Tehrondagi mag‘lubiyat degan javobni qaytardi. O‘shanda Mirjalol Qosimov boshqaruvidagi O‘zbekiston termasi Eronni safarda mag‘lub etgan bo‘lib, bu g‘alaba hozirga qadar yagonasi bo‘lib turibdi.
Ma’lumot uchun, 4 yil muqaddam JCh—2014 saralashida O‘zbekiston termasi bosh murabbiyi Vadim Abramov Erondan Toshkentda mag‘lub bo‘lgani uchun iste’foga chiqarilgandi.
Batafsil | Подробно | Read more... Daryo