JCh—2018. Osiyo qit’asi saralashidan o‘rin olgan 6 uchrashuv sharhi va ularning videolavhalari

Rossiya mundiali uchun harakat qilayotgan Osiyoning 12 mamlakati kecha — 6-oktabr kuni hal qiluvchi saralashning 3-turi doirasida maydonga tushdi.

Foto: OFK matbuot xizmati

Dastlabki ikki turdan keyin “A” guruhini boshqarib turgan O‘zbekiston terma jamoasi peshqadamlikni topshirdi. Hal qiluvchi bosqichni Qatarni mag‘lub etish bilan boshlagan Karlush Keyrush boshqaruvidagi Eron bir tur avval Xitoy darvozasiga gol ura olmagandi. Bu safar esa forslar O‘zbekistondan g‘alaba bilan qaytdi.



Eron terma jamoasi o‘z tarixida Toshkentga to‘rtinchi bor tashrif buyurgandi va shularning 3 tasida zafar quchishga erishdi. Yana bitta bellashuvda hisob ochilmagan. O‘zbekistonliklar Toshkentdagi o‘yinlarda birorta marta bo‘lsin Eron darvozasiga gol urmagan.
Janubiy Koreya terma jamoasi o‘z maydonida o‘tayotgan ikkinchi o‘yinda ham 3:2 hisobida zafar quchdi. Ilk turda Xitoyga 3 ta gol urgan koreyaliklar, keyinroq 2 ta gol o‘tkazib yuborgandi. Qatarga qarshi bellashuvda esa hisobda ortda borayotgan joyidan o‘yinni qutqarib qoldi. Qayd etish kerak, Shtilike jamoasi 2-turda Suriya darvozasiga gol ura olmagandi.



Saralashni O‘zbekistonga qarshi minimal hisobdagi mag‘lubiyat bilan boshlagan Suriya termasi 3-turga kelib Xitoyni mag‘lub etishga muvaffaq bo‘ldi. Uy uchrashuvlarini neytral mamlakatda o‘tkazishga majbur bo‘layotgan Suriya bir tur avval Janubiy Koreyadan 1 ochko tortib olishni uddalagan bo‘lsa, bu safar forslar eplay olmagan ishga jazm etdi.



JCh—2018
3-saralash. “A” guruhi, 3-tur
6-oktabr, payshanba
Janubiy Koreya — Qatar 3:2
Gollar: Ki Sung Yong, 11 (1:0). Hassan Al-Haydos, 16-pen (1:1). Sebastyan Soriya Kuintana, 45 (1:2). Ji Dong Von, 56 (2:2). Son Xyon Min, 58 (3:2).
Chetlatish: Jeong Ho Hong, 66 (J).
Xitoy — Suriya 0:1
Gol: Muhammad Al-Mavas, 54 (0:1).
O‘zbekiston — Eron 0:1
Gol: Jalol Xusayniy, 26 (0:1).
O‘zbekiston: Aleksandr Lobanov — Yegor Krimets, Anzur Ismoilov, Azizbek Haydarov, Server Jeparov (Aleksandr Geynrix, 38), Sardor Rashidov (Jaloliddin Masharipov, 62), Igor Sergeyev (Marat Bikmayev, 72), Otabek Shukurov, Vitaliy Denisov, Islom To‘xtaxo‘jayev, Eldor Shomurodov.
Eron: Alirizo Beiranvand — Ehson Xojsafiy, Jalol Xusayniy, Milad Muhammadiy, Said Izzatullohiy, Mas’ud Shojaiy (Andranik Temuriyon, 84), Murtazo Puraliganji, Vohid Amiriy, Rizo G‘uchannajod (Sardor Azmun, 63), Mehdi Taremiy (Alirizo Jahonbahsh, 75), Ramin Rizoian.

Foto: FIFA

Saralashning “B guruhida raqobat nisbatan kuchliroq. 3-turdan keyin Iroq va Tailand termalari yaqqol autsayder bo‘lib ajralib qoldi. Qolgan to‘rt mamlakat esa Rossiyaga borish uchun harakatda.
Yaponiya terma jamoasi hal qiluvchi bosqichni o‘z maydonida BAAdan yengilish bilan boshlagandi. 6-oktabr kuni yaponiyaliklar boshqa bir arab mamlakatiga qarshi o‘yinda ham ochko yo‘qotishi mumkin edi. Uchrashuvning 95-daqiqasida urilgan gol kunchiqar yurt termasini Iroqqa qarshi ochko yo‘qotishdan qutqarib qoldi.



Yaponiyani safarda mag‘lub etgan, o‘z maydonida esa Avstraliyaga kuchi yetmagan BAA 3-turda 3 ochkoni qo‘lga kiritdi. Ali Mabhutning dubli va Ahmad Halilning 1 ta goli Tailandni mag‘lub etish uchun yetarli bo‘ldi.



Saralashning dastlabki ikki turini g‘alaba bilan boshlagan Saudiya Arabistoni hamda Avstraliya terma jamoalari arab diyorida to‘qnash keldi. Uchrashuv 2:2 hisobidagi durang bilan o‘z yakuniga yetdi.



Osiyo saralashining 3-turidan keyin ochko yo‘qotmagan jamoaning o‘zi qolmadi.
JCh—2018
3-saralash. “B” guruhi, 3-tur
6-oktabr, payshanba
Yaponiya — Iroq 2:1
Gollar: Genki Haraguchi, 26 (1:0). Sa’d Luaybi, 60 (1:1). Hotaru Yumaguchi, 90+5 (2:1).
BAA — Tailand 3:1
Gollar: Ali Mabhut, 14 (1:0). Ali Mabhut, 47 (2:0). Tana Chanabut, 65 (2:1). Ahmad Halil, 90+3 (3:1).
Saudiya Arabistoni — Avstraliya 2:2
Gollar: Taysar Al-Jassim, 5 (1:0). Trent Seynsbyuri, 45 (1:1). Tomi Yurich, 71 (1:2). Nosir Ash-Shamroni, 79 (2:2).

Foto: FIFA


Batafsil | Подробно | Read more... Daryo