Qatar Airways qariyb 12 milliard dollarga Boeing’dan 40 ta samolyot xarid qiladi

Qatar Airways aviakompaniyasi 7-oktabr, juma kuni Boeing korporatsiyasidan 11,7 milliard dollarga 40 ta yo‘lovchi samolyoti xarid qilish haqidagi qarorini ma’lum qildi. Bu haqda yo‘lovchi tashuvchi kompaniya rahbari Akbar al-Bakir Vashingtondagi matbuot anjumanida ma’lum qildi, deb yozadi “TASS”.

Foto: EPA

Bundan tashqari, yana 60 ta samolyot sotib olish rejalashtirilmoqda.
“Ixtiyorimizdagi keng fyuzelyajli Boeing samolyotlari aksariyat uzoq reyslarda qo‘llaniladi va hozirgi flotimizning deyarli yarmini tashkil etadi. Tor fyuzelyajli samolyotlar bo‘yicha yangi buyurtmamiz haqida ma’lum qilishdan xursandmiz”, — dedi al-Bakir. U Qatar Airways ixtiyorida 190 ta samolyot borligini ta’kidlab o‘tdi.
Shartnoma shartlariga ko‘ra, havo kemalari ishlab chiqaruvchisi 290 nafargacha yo‘lovchini sig‘dira oladigan 30 ta Boeing 787 Dreamliner va har biri 396 kishiga mo‘ljallangan o‘nta Boeing 777-300ER samolyotini yetkazib berishi kerak.
Bundan tashqari, Qatar Airways rahbariyati har biri 200 nafargacha yo‘lovchini tashiy oladigan 60 ta 737-8MAX modelidagi samolyotni xarid qilish niyati ifodalangan xatni imzoladi.
Batafsil | Подробно | Read more... Daryo