O‘zbek aktyorlarining birinchi gonorarlari: 244 so‘m olgan radiosuxandon, “Sumerki”dagi 750 dollarlik rol, ikki qismli klipdagi ijro uchun 50 ming so‘m

Ilk maosh, ilk ish haqi — ko‘pchilik kishilar uchun yoddan chiqmas bir voqea. Ma’lum bir moddiy rag‘batlantirishga loyiq ko‘rilgan birinchi ishini aksariyat odamlar o‘zgacha bir zavq bilan yodga oladi.
Jurnalist Feruz Muhammad bugun o‘zbek kinosida o‘z o‘rniga ega bo‘lgan taniqli aktyorlar o‘rtasida so‘rov o‘tkazib, ularning ilk gonorarlari miqdori qancha bo‘lgani bilan qiziqdi.
Aktyor va kaskadyor Alixan

Foto: “Daryo”

Birinchi gonorarimni AQShda, 2009—2010-yillarda suratga olingan “Twilight” (ruscha “Sumerki”) filmidagi ishtirokim uchun olganman. Filmdagi ommaviy sahnadan sal kattaroq ijroim uchun kuniga 250 dollar — uch kunda 750 dollar gonorar berishgan.
Aktyor Javohir Zokirov

Foto: “Daryo”

Ilk olgan gonorarim esimda yo‘q, ammo 1998-yilda suratga olingan “Bo Ba Bu” nomli filmdagi ishtirokim uchun 1000 dollar olganman.
Aktyor Yigitali Mamajonov

Foto: “Daryo”

Ilk olgan gonorarim esimda yo‘q-ku, ammo institutning ikkinchi kursida o‘qib yurgan vaqtimda rol o‘ynagan dastlabki filmlarimdan biri — “Yozsiz yil”dagi (2012-yilda suratga olingan) ijroim uchun 750—800 ming so‘m atrofida gonorar olganman.
Aktyor Akbarxo‘ja Rasulov

Foto: “Daryo”

Kinodagi ilk rolim uchun qancha gonorar olganimni, to‘g‘risi, eslay olmayman. Ammo 12 yoshimda “Kelajak tongi” radiostudiyasida suhandon sifatida ishlab, 244 so‘m gonorar olganim yodimda.
Aktyor Mirolim Qilichev

Foto: “Daryo”

Birinchi — 150 ming so‘mlik gonorarimni xonanda Murodbek Qilichevning “Baxt tilarman” nomli qo‘shig‘iga ishlangan klipida suratga tushganim uchun olganman. Bu o‘sha vaqt uchun yaxshigina katta pul edi. “Uqubat” nomli filmda suratga tushganim uchun 1,2 million so‘m gonorar olganman.
Aktyor Sherzod Bin

Foto: “Daryo”

Ilk gonorarimni xonanda Ulug‘bek Rahmatullayevning “Jonim” nomli qo‘shig‘iga ishlangan klipda suratga tushganim uchun olganim yodimda. Ammo qancha pul berishganini eslay olmayman, rosti.
Aktyor va xonanda Sharof Muqimov

Foto: “Daryo”

2002—2003-yillarda xonanda Sobirjon Mo‘minovning “Onangizga kuyov bulaman” qo‘shig‘ining 2 qismli klipida suratga tushganim uchun 50 ming so‘m, Shahlo Rustamovaning “Yo‘lingizda ko‘zlarim humor-humor” qo‘shig‘i klipidagi ijroim uchun 60 ming so‘m gonorar olganman. Bu o‘sha vaqtlarda oddiy bir talaba uchun katta pul edi. Birinchi katta gonorarimni 2007-yili, Burhon Sharopovning “Niqob” filmidagi rolim uchun olganman — o‘sha paytda bu pulga bitta Nexia berar edi. Ijodimdagi eng katta gonorarni esa 2006-yili “Jonim seni” nomli albomimni “Ohang Media” studiyasiga sotganimda olganman — o‘sha pulga bitta Laceetti avtomobilini sotib olish mumkin edi. U vaqtlarda albom sotilishiga qarab juda katta pul taklif qilishar edi. Videoqaroqchilar paydo bo‘lganidan keyin bunday gonorarlar ham tarixda qoldi.
Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo