Ronaldu va Messini ortda qoldirgan Buffon Golden Foot–2016 mukofoti sohibi bo‘ldi

Futbol bo‘yicha Italiya terma jamoasi va “Yuventus” klubi darvozaboni Janluiji Buffon 29 yoshdan katta bo‘lgan va futbol rivojiga hissa qo‘shgan futbolchilarga beriladigan Golden Foot mukofoti sohibi bo‘ldi. Bu haqda “Sport-Ekspress” xabar bermoqda .

Foto: “Yuventus” FK matbuot xizmati

38 yoshli posbon mukofot uchun bahsda Krishtianu Ronaldu, Lionel Messi, Edinson Kavani, Frenk Lempard, Iker Kasilyas, Kaka, Tiago Silva, Andrea Pirlo va Ueyn Runi kabi taniqli futbolchilarni ortda qoldirdi.
Qayd etish kerakki, ushbu mukofot futbolchiga hayoti davomida faqat bir marta beriladi. Bundan tashqari, Buffon Golden Foot’ni yutib olgan birinchi darvozabon bo‘ldi.
Shuningdek, italiyalik darvozabon Monakodagi chempionlar xiyobonida oyoqlari izini qoldirdi.
Quyida Golden Foot’ning avvalgi sohiblari keltirilgan.
2003 – Roberto Badjo (Italiya)
2004 – Pavel Nedved (Chexiya)
2005 – Andrey Shevchenko (Ukraina)
2006 – Ronaldo (Braziliya)
2007 – Alessandro Del-Pyero (Italiya)
2008 – Roberto Karlos (Braziliya)
2009 – Ronaldinyo (Braziliya)
2010 – Franchesko Totti (Italiya)
2011 – Rayan Giggz (Uels)
2012 – Zlatan Ibrahimovich (Shvetsiya)
2013 – Didye Drogba (Kot-d’Ivuar)
2014 – Andres Inyesta (Ispaniya)
2015 – Samuel Eto’O (Kamerun)
Batafsil | Подробно | Read more... Daryo