Amerikaliklarga Kubadan cheklovlarsiz rom va sigara olib kelish ruxsat etildi

AQSh hukumati Kubaga nisbatan sanksion rejim yana bir qadar yumshaganini e’lon qildi. Prezident Barak Obama matbuot uchun bayonot berib, unda yangi siyosiy direktivani “Kuba bilan munosabatlarni normallashtirish bo‘yicha xatti-harakatlarda olg‘a tashlangan navbatdagi qadam” deb atadi. Bu haqda “TASS” xabar bermoqda .

Foto: Getty Images

Qabul qilingan qaror tafsilotlari 13-oktabr kuni AQSh moliya va savdo vazirliklari tomonidan tarqatilgan ogohlantirishda aks etdi.
Hujjatda ta’kidlanishicha, AQShga Kuba mahsulotlarini shaxsiy foydalanishga olib kirishda narx va miqdor cheklovlari bekor qilinadi. Bu alkogol va tamaki mahsulotlariga ham oiddir. Shunday qilib, amerikaliklar Kubadan rom, sigara va dori vositalarini cheklovsiz olib kirishi mumkin, deb aniqlik kiritadi jurnalistlar.
O‘z navbatida, kubaliklarga internet orqali yoki boshqa yo‘llar bilan AQSh mahsulotlarini sotib olish ruxsat etildi.
Bundan tashqari, yuklarning Kuba aeroportlari orqali tranzitiga ruxsat berildi.
AQSh ma’muriyatining yangi qarori 17-oktabrda — tegishli bildirishnoma Federal Register hukumat axborotnomasida chop etilganidan so‘ng kuchga kiradi.
Batafsil | Подробно | Read more... Daryo