“O‘zbekiston havo yo‘llari” onlayn-bronlash va haq to‘lash bo‘yicha xizmatlar turini kengaytiradi

“O‘zbekiston havo yo‘llari” shu yil 18-oktabridan aviachiptalarni onlayn-bronlash va ular uchun UzCard bank kartochkalari vositasida haq to‘lash bo‘yicha xizmatlar turini kengaytiradi. Bu haqda milliy aviakompaniya sayti xabar bermoqda . 

Foto: “O‘zbekiston havo yo‘llari”

Endi uydan yoki ofisdan turib istalgan payt respublika ichidagi yo‘nalishlar, shuningdek, xorij mamlakatlariga aviachiptalarni mustaqil ravishda rasmiylashtirish mumkin.
Buyurtmani rasmiylashtirish uchun aviakompaniya saytiga kirish lozim. Xizmatlar aviachiptalar sotishning amaldagi qoidalariga muvofiq amalga oshiriladi va UzCard plastik kartalari vositasida haq to‘lanadi.  Keyingi bosqichda Visa va MasterCard valyuta plastik kartalari yordamida haq to‘lash tizimini amalga tatbiq etish rejalashtirilgan.
Internet orqali bronlash va haq to‘lash muvaffaqiyatli amalga oshirilganda, bronlash paytida ko‘rsatilgan elektron manzil va mobil telefon raqamiga safaringiz haqida batafsil ma’lumot aks etgan elektron chiptaning yo‘nalish ko‘rinishi, shuningdek, xarid tasdiqlanganligi va UzCard plastik kartochkasidan mablag‘ yechib olinganligi to‘g‘risida SMS-xabar olasiz.
Uchib ketish aeroportida elektron aviachipta ko‘rinishi va yo‘lovchi shaxsini tasdiqlovchi hujjatni (pasport) ko‘rsatish kifoya. Internet orqali bronlash va haq to‘lash reys parvozidan kamida 3 soat oldin amalga oshirilishi mumkin.
Batafsil | Подробно | Read more... Daryo