Turkiya armiyasi Suriya shimolida IShIDning 64 obyektini yo‘q qildi

Turkiya armiyasi “Frot qalqoni” operatsiyasi davomida Suriya shimolida bir sutka ichida artilleriya va tanklar yordamida IShID ekstremistik guruhining 64 ta obyektini yo‘q qildi. Bu haqda Turkiya Bosh shtabiga tayanib, “RIA Novosti” xabar bermoqda .

Foto: AP Photo

Xabarda ta’kidlanishicha, butun operatsiya davomida Suriya shimolidagi 155 ta aholi punkti terrorchilardan ozod etildi. Umumiy maydoni 1260 kvadrat kilometrni tashkil etuvchi hudud esa Suriya ozodlik armiyasi nazoratiga o‘tdi.
Turkiya Bosh shtabining qayd etishicha, harbiy-havo kuchlarining IShIDga tegishli beshta obyektiga zarba berishi oqibatida 6 terrorchi yo‘q qilindi.
Turkiya armiyasi 24-avgust kuni IShIDga qarshi “Frot qalqoni” operatsiyasini boshlagan edi. Turkiya prezidenti Rajab Toyyib Erdo‘g‘onning aytishicha, operatsiyaning maqsadi 5 ming kvadrat kilometr hududni terrorchilardan tozalab, muhojirlar uchun xavfsiz hudud yaratishdan iborat.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Batafsil | Подробно | Read more... Daryo