Osiyo Chempionati—U19. O‘zbekiston yoshlar terma jamoasining chorak finaldagi raqibi Eron bo‘ldi

Jasur Abduraimov murabbiylik qilayotgan futbol bo‘yicha O‘zbekiston yoshlar terma jamoasi Osiyo Chempionatining chorak finalida Eron bilan to‘qnash keladi.

Foto: OFK matbuot xizmati

O‘zbekiston yoshlari guruh bosqichining 2-turidan keyinoq peshqadamlikni kafolatlab qo‘ygan bo‘lsa, “C” guruhi yakunida Eron yoshlari 2-o‘rinni qo‘lga kiritdi.
Forslar qit’a chempionatini Qatarga qarshi 1:1 hisobidagi durang bilan boshlagan bo‘lsa, 2-turda Yaponiya bilan murosaga rozi bo‘lgandi — 0:0. So‘nggi turda esa Eron Yamandan ustun keldi — 1:0.
Kunning ikkinchi o‘yinida Yaponiya yoshlar terma jamoasi Qatarni 3:0 hisobida mag‘lubiyatga uchratdi. Natijada qatarlik futbolchilar Osiyo Chempionati bilan xayrlashdi. Yaponiya 7 ochko bilan “C” guruhini peshqadam sifatida yakunlagan bo‘lsa, Eron 5 ochko bilan ikkinchi bo‘ldi.
Osiyo Chempionati—U19
“C” guruhi. 3-tur
20-oktabr, payshanba
Qatar — Yaponiya 0:3
Gollar: Yuto Ivasaki, 14 (0:1). Miyoshi Koji, 45 (0:2). Tomiyasu Takehiro, 62 (0:3).
Yaman — Eron 0:1
Gol: Abolfayz Razzohpur, 45 (0:1).

Foto: “Daryo”

“D” guruhi peshqadami bo‘lgan O‘zbekiston ertaga — 21-oktabr kuni Xitoyga qarshi o‘yin bilan guruh bosqichini yakunlaydi.
“A” guruhida kurash olib borgan Janubiy Koreya terma jamoasi 6 ochko jamg‘arganiga qaramay, Osiyo Chempionati bilan xayrlashgandi. Shu boisdan ham 5-o‘rin uchun kurash bo‘lmaydi. Janubiy Koreya 2017-yilgi mundial mezboni sifatida Jahon Chempionatida ishtirok etadi. Demak, O‘zbekiston mundialga borishni istasa, 24-oktabr kuni Eronni taslim qilishi kerak bo‘ladi.
Batafsil | Подробно | Read more... Daryo