“O‘zbekneftgaz”ga fuqarolardan Bosh vazir virtual qabulxonasi orqali 137 ta murojaat kelib tushdi

“O‘zbekneftgaz” milliy xolding kompaniyasi, uning tarkibiga kiruvchi 200 dan ortiq korxona va tashkilotlarda O‘zbekiston Respublikasining “Jismoniy va yuridik shaxslarning murojaatlari to‘g‘risida”gi Qonuni ijrosi doimo diqqat markazida. Bu haqda kompaniya saytida ma’lum qilindi .
 

Foto: “O‘zbekneftgaz” MXK

2016-yil sentabr—oktabr oylarida O‘zbekiston Respublikasi Bosh vazirining virtual qabulxonasi orqali “O‘zbekneftgaz” MXKga fuqarolardan 137 ta murojaat kelib tushdi. Shuningdek, fuqarolar interaktiv davlat xizmatlarining Yagona portali orqali ham o‘z murojaatlarini jo‘natmoqda. Yanvar—oktabr oylari davomida ushbu portal orqali 1544 ta murojaat kelib tushgan bo‘lib, ularning 1533 tasi bo‘yicha tegishli qarorlar qabul qilindi va javoblar yuborildi.
“O‘zbekneftgaz” MXK faoliyati to‘g‘risida to‘liq ma’lumot kompaniya saytida ham keltirilgan. Ushbu korporativ sayt orqali fuqarolar xoldingga murojaat etish va neftgaz tarmog‘i mutaxassislarining malakali yordamidan foydalanish imkoniga ega. Xolding “Ishonch telefoni”ga (+998 71 233-28-88) fuqarolardan kelib tushayotgan qo‘ng‘iroqlar qisqa fursatlarda ko‘rib chiqilmoqda. 
Bugungi kunda fuqarolar murojaatlarining aksariyati aholini tabiiy va suyultirilgan gaz bilan ta’minlashga bog‘liq bo‘lmoqda. Xususan, Samarqand va Farg‘ona viloyatlaridagi fuqarolardan gaz ta’minotini yaxshilashga oid murojaatlar kelib tushgan. Gaz ta’minoti korxonalari mutaxassislari joylarga borib, murojaatlar sabablarini o‘rganib chiqdi va mavjud kamchiliklarni bartaraf etish yuzasidan qisqa muddatlarda zaruriy choralarni ko‘rdi.
Batafsil | Подробно | Read more... Daryo