Toshkent bojxonachilari Hindistondan yuborilgan 27,5 mln so‘mlik xina bo‘yoqlarini ushlab qoldi

Yaqinda Toshkent shahar bojxona xodimlari tomonidan katta miqdordagi tovar-moddiy boyliklarning noqonuniy olib kirilishiga chek qo‘yildi. Bu haqda Toshkent shahar bojxona boshqarmasi Axborot xizmati “Daryo”ga xabar berdi.

Foto: Davlat bojxona qo‘mitasi matbuot xizmati

Jumladan, Toshkent shahar bojxona boshqarmasining “Keles” temiryo‘l bojxona posti xodimlari tomonidan Novosibirsk—Toshkent yo‘nalishi bo‘yicha kirib kelgan yo‘lovchi tashish poyezdi yo‘lovchilarining qo‘l yuklarini bojxona nazoratidan o‘tkazish natijasida fuqarolar A.Raximov hamda O.Maxmudovlar (maqoladagi barcha ism-shariflar o‘zgartirilgan) umumiy qiymati 36,6 million so‘mdan ortiq bo‘lgan 70 turdagi tovar-moddiy boyliklar, shu jumladan maishiy tozalash vositalari va parfyumeriya mahsulotlarini yo‘lovchi bojxona deklaratsiyasida va bojxonachilarning og‘zaki so‘rovi paytida ma’lum qilmasdan turib, olib kirishga uringani fosh qilindi.
Shuningdek, post xodimlari Olmaota—Nukus yo‘nalishi bo‘yicha kirib kelgan poyezd yo‘lovchisi U.Jabborov tomonidan qiymati salkam 3,4 million so‘mlik tovar-moddiy boyliklari, xususan parfyumeriya va ayollar gigiyenik vositalarini noqonuniy ravishda olib kirishga uringan paytda to‘xtatib qolindi.
Yuqoridagi holatlarda ushbu shaxslar yuridik shaxs bo‘lmasdan tadbirkorlik faoliyati bilan shug‘ullanuvchi jismoniy shaxs sifatida davlat ro‘yxatidan o‘tmasdan turib, tovar-moddiy boyliklarini tijorat maqsadida olib kirishga uringan.
Toshkent shahar bojxona boshqarmasining “Boshpochtamt” bojxona posti xodimlari Hindistondan kelgan pochta jo‘natmalarining Marg‘ilon tumanidagi aynan bir ko‘chada istiqomat qiluvchi bir nechta shaxslar nomiga yuborilganligidan shubhalanib qoldi. Mazkur pochta jo‘natmalari amaldagi tartiblarga muvofiq bojxona ko‘rigidan o‘tkazilganda, ularda aynan bir turdagi tovar – ayollar uchun xina bo‘yoqlari yuborilganligi ayon bo‘ldi. SN-23 shaklidagi pochta deklaratsiyasida ko‘rsatilmagan 5500 donadan ortiq xina bo‘yoqlarining umumiy qiymati 27,5 million so‘mdan ortiq bo‘lib, ular shaxsiy foydalanish uchun emas, aksincha tijorat maqsadida yuborilganligi aniqlandi.
Hozirda mazkur holatlar yuzasidan bojxona tekshiruvlari va surishtiruv harakatlari davom ettirilmoqda.
Eslatib o‘tamiz, parfyumeriya va kosmetika vositalari Vazirlar Mahkamasining “O‘zbekiston Respublikasiga iste’mol tovarlari olib kirishni takomillashtirishga doir qo‘shimcha chora-tadbirlar to‘g‘risida” 2013-yil 13-maydagi 127-sonli qaroriga muvofiq davlat tilida markalanishi shart bo‘lgan iste’mol tovarlari ro‘yxatiga kiritilgan.
Shuningdek, bu turdagi tovarlar Vazirlar Mahkamasining “Sertifikatlashtirish tartibotlarini va sifat menejmenti tizimlarini joriy etishni takomillashtirishga doir qo‘shimcha chora-tadbirlar to‘g‘risida” 2011-yil 28-apreldagi 122-son Qaroriga binoan, majburiy tartibda sertifikatlanadigan mahsulot turlari ro‘yxatiga ham kiritilgan.
Batafsil | Подробно | Read more... Daryo