Tomas Shennon AQSh rahbariyati O‘zbekiston bilan munosabatlarni rivojlantirishdan manfaatdor ekanini Shavkat Mirziyoyevga ma’lum qildi

O‘zbekiston Prezidenti vazifasini bajaruvchi Shavkat Mirziyoyev 29-oktabr kuni AQSh davlat kotibining siyosiy masalalar bo‘yicha o‘rinbosari Tomas Shennonni qabul qildi, deya xabar bermoqda O‘zA.

Foto: Facebook / U.S. Embassy Tashkent

Shavkat Mirziyoyev mehmonni O‘zbekistonga tashrifi bilan samimiy qutlab, Islom Karimov vafoti munosabati bilan chuqur hamdardlik izhor etgani va qo‘llab-quvvatlagani uchun AQSh prezidenti Barak Obama va davlat kotibi Jon Kerriga samimiy minnatdorlik bildirdi.
Suhbat davomida tomonlar O‘zbekiston—AQSh munosabatlari o‘zaro hurmat va ishonch, bir-birining manfaatlarini inobatga olish tamoyillari asosida izchil, muvaffaqiyatli rivojlanayotgani va mustahkamlanib borayotganini ta’kidladi.
Suhbat chog‘ida O‘zbekiston va AQSh ikki mamlakatlarning uzoq muddatli manfaatlariga mos keladigan barcha istiqbolli yo‘nalishlarda sheriklik va hamkorlikni izchil mustahkamlab, kengaytirib borish uchun zarur imkoniyat va salohiyatga ega ekani qayd etildi.
“AQSh delegatsiyasi rahbari O‘zbekistonda amalga oshirilayotgan keng ko‘lamli sotsial-iqtisodiy va ijtimoiy-siyosiy islohotlarning, fuqarolik jamiyati asoslarini va demokratik qadriyatlarni mustahkamlashga qaratilgan ulkan o‘zgarishlarning yorqin natijalarini yuksak baholadi”, — deb yozadi O‘zA.
Tomas Shennon O‘zbekistonga tashrifi asnosida o‘zbek xalqi boy tarixiy-madaniy va ma’naviy merosga ega ekaniga yana bir bor amin bo‘lganini alohida qayd etgan. Yoshlar, turli diniy konfessiyalar va keng jamoatchilik vakillari bilan ochiq va samimiy suhbatlar, ularning ertangi kunga ishonchi, intiluvchanligi, qat’iyati va g‘ayrat-shijoati mehmonda katta taassurot qoldirgan.
Tomas Shennon samimiy qabul uchun Shavkat Mirziyoyevga minnatdorlik bildirdi va AQSh rahbariyati O‘zbekiston bilan serqirra munosabatlarni izchil va barqaror rivojlantirishdan manfaatdor ekanini ta’kidladi. Suhbat davomida ikki va ko‘p tomonlama ahamiyatga ega boshqa dolzarb masalalar ham ko‘rib chiqildi.
Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo