O‘zbekiston aeroportlarida jonivorlar shaxsan egalarining qo‘liga topshiriladigan tartib o‘rnatildi

Jonivorlarni himoya qilish “Mehr va oqibat” jamiyati vakillarining “O‘zbekiston havo yo‘llari” milliy aviakompaniyasi bilan muzokaralari natijasida egalari bilan birga samolyotda safar qiladigan jonzotlar berilishi tartibiga o‘zgartirish kiritildi. Bu haqda “Gazeta.uz” xabar bermoqda . 

Foto: Facebook / Mehrvaoqibat

“Mehr va oqibat” jamiyati vakillari ijtimoiy tarmoqlarda o‘tkazgan so‘rov natijalaridan ma’lum bo‘lishicha, jonivorlar bagaj bilan birga berilishi oqibatida it va mushuklar bagaj lentasidan yiqilgan, shikastlangan holatlar bo‘lgan. Shunday hodisaga duch kelgan va itini davolatishga majbur bo‘lib, buning uchun katta mablag‘ sarflagan mijozlardan birining jamiyatga murojaati “O‘zbekiston havo yo‘llari” milliy aviakompaniyasiga maktub yo‘llashga undadi. 
Endi O‘zbekistondagi 11 aeroportda uy hayvonlari konteynerlari uchib kelgandan so‘ng bagajdan alohida, shaxsan egalarining qo‘liga, tilxat bilan topshiriladi. Bunga rioya etmaslik xodimlarga nisbatan jarima choralari ko‘rilishiga sabab bo‘ladi. Jonivorlari bilan uchayotgan yo‘lovchilarga xizmat ko‘rsatish tartibini belgilovchi hujjatlarga ham tegishli o‘zgartirish kiritildi. 
Batafsil | Подробно | Read more... Daryo