Самарқандда янги ўт ўчириш депоси ишга тушди

Самарқанд шаҳрида 2-сон алоҳида ҳарбийлаштирилган ёнғин хавфсизлиги постини расмий фойдаланишга топшириш маросими бўлиб ўтди. Бу ҳақда «12news.uz» хабар бермоқда .

Фото: 12news.uz

Ички ишлар вазирлиги томонидан тасдиқланган штат жадвалига мувофиқ 22 киши хизмат қиладиган мазкур пост SamAvto томонидан ишлаб чиқарилган ISUZU русумидаги икки ўт ўчириш машинаси, шунингдек, шаҳар аҳолисининг ёнғин хавфсизлигини таъминлаш учун зарур бўлган бошқа махсус техникалар билан таъминланган.
Ўт ўчирувчиларнинг янги биноси аҳоли зич яшайдиган Гулобод кўчасида — Самарқанд давлат университетининг кўплаб ўқув корпуслари жойлашган Университет хиёбони ва сўнгги йилларда халқаро симпозиум ва конференциялар мезбонига айланган «Форумлар мажмуаси» яқинида жойлашган.
Маълум бўлишича, Вазирлар Маҳкамасининг қарорига мувофиқ, 2016—2020 йилларда Самарқанд вилоятида яна тўртта ўт ўчириш депоси қурилади. Уларнинг дастлабкиси 2016 йили Самарқанд шаҳрининг Рудакий кўчасида бунёд этилади.
Иккинчи депони 2017 йили Каттақўрғон туманининг Пайшанба шаҳарчасида, учинчисини 2018 йили Пахтачи туманининг Зиадин шаҳарчасида, тўртинчисини эса 2019 йили Нуробод туманида фойдаланишга топшириш режалаштирилган.
Batafsil | Подробно | Read more... Daryo