Samsung AQShdagi nufuzli gazetalar orqali Galaxy Note 7 uchun uzr so‘radi

Samsung 7-noyabr, dushanba kuni Wall Street Journal, The New York Times va The Washington Post kabi nufuzli gazetalar sahifalari orqali amerikaliklardan Galaxy Note 7 uchun uzr so‘radi. Bu haqda TJournal xabar bermoqda . 

Foto: TJournal

“Bizning bosh tamoyillarimizdan biri bozordagi eng sifatli va xavfsiz mahsulotlarni ishlab chiqishdan iborat. Yaqinda buning uddasidan chiqolmadik va bu uchun kechirim so‘raymiz. Smartfonning har bir qirrasi, jumladan, qurilma ta’minoti va dasturiy ta’minot, ishlab chiqarish texnikasi, batareyalar konstruksiyasi ko‘rib chiqiladi. Yuzaga kelgan muammoga tezroq oydinlik kiritishga harakat qilamiz, biroq to‘g‘ri va aniq javoblar olish uchun vaqt ketadi”, — deyiladi Samsung Electronics North America bosh direktori Gregori Li imzolagan matnda. 
Nufuzli nashrlar orqali mijozlardan uzr so‘rash yirik kompaniyalar orasida ommalashib bormoqda. O‘tgan yil noyabrida Volkswagen “dizelli mojaro” uchun kechirim so‘rash maqsadida shunday yo‘l tutgandi. 
Eslatib o‘tamiz, oldinroq Samsung menejerlari Xitoyda Galaxy Note 7 uchun tiz cho‘kib kechirim so‘ragani haqida ma’lum qilingandi . 
Batafsil | Подробно | Read more... Daryo