Paxta terimi vaqtida o‘rta ta’lim muassasalaridagi davomat 94 foizni tashkil etdi

O‘zbekiston kasaba uyushmalari va Xalqaro mehnat tashkiloti (XMT) seminarida paxta kampaniyasi vaqtida o‘tkazilgan bolalar mehnati va majburiy ishga jalb qilish bo‘yicha milliy monitoringning dastlabki natijalari ma’lum qilindi. Bu “Gazeta.uz” xabar bermoqda .

Foto: “Gazeta.uz”

Kasaba uyushmalari federatsiyasi matbuot xizmatiga ko‘ra, milliy monitoringni o‘tkazish uchun 11 ta hududiy ishchi guruhi tashkil etilib, ularning yetakchilari XMT ekspertlari ishtirokidagi o‘quvlarda qatnashdi.
Monitoring guruhlari respublikaning barcha hududlaridagi korxona, tashkilot va muassasalar, fermer xo‘jaliklari, paxta maydonlariga tasodifiy tartibda tashrif buyurdi. Kuzatuvlar nafaqat bolalar mehnati va majburiy ishga jalb qilish, balki terimchilarga yaratilgan mehnat sharoitlari, to‘lov va dam olishi masalalari bo‘yicha ham olib borildi. Monitoring davrida hududiy guruhlar 6615 nafar respondent bilan intervyu o‘tkazdi.
Kuzatuvchilar ma’lumotiga ko‘ra, joriy yilgi paxta terimi mavsumi boshlanishiga qadar hamda ushbu davr mobaynida mutasaddi tashkilotlar tomonidan bolalar mehnatidan foydalanish va majburiy ishga jalb qilish holatlari sodir etilmagan. Tibbiyot va ta’lim muassasalarining uzluksiz ishlashi ta’minlandi. O‘rta ta’lim muassasalarida davomat 93,8 foizni tashkil etdi. Transport, bozor, savdo va xizmat ko‘rsatish korxonalari, dorixonalar normal tartibda faoliyat ko‘rsatdi.
Respublikaning barcha tuman va shaharlarida terimchilar paxta yig‘im-terim ishlariga erkin tarzda yollanishi to‘g‘risidagi 500 dan ziyod banner hamda e’lonlar o‘rnatildi. Korxona va tashkilotlarda bolalar mehnati va majburiy mehnatga yo‘l qo‘yilmasligi to‘g‘risidagi 44,5 ming plakat joylashtirildi. Ish beruvchilari va fermerlar o‘rtasida mehnatga majburiy jalb qilish va bolalar mehnatidan foydalanganlik uchun ma’muriy javobgarlik to‘g‘risidagi 100 ming flayer tarqatildi.
Batafsil | Подробно | Read more... Daryo