Saudiyalik Fahad Al-Mirdasiy Janubiy Koreya va O‘zbekiston to‘qnashuviga uchinchi bor hakamlik qiladi

O‘FF matbuot xizmati 15-noyabr kuni bo‘lib o‘tadigan Janubiy Koreya — O‘zbekiston termalari o‘yini Saudiya Arabistonidan bo‘lgan hakam Fahad Al-Mirdasiyga ishonib topshirilgani haqida ma’lumot berdi . Qanotlarda unga vatandoshlari yordam beradi.

Foto: Getty Images

JCh—2018 3-saralash bosqichi doirasida bo‘lib o‘tadigan bellashuvga qadar ham Fahad Al-Mirdasiy Janubiy Koreya hamda O‘zbekiston ishtirokidagi ikki bellashuvda ishlagan. Har ikki o‘yin o‘zbekistonlik futbolchilarning mag‘lubiyati bilan yakuniga yetgan.
2015-yilning 22-yanvar kuni O‘zbekiston va Janubiy Koreya termalari Osiyo Kubogining chorak finalida o‘zaro to‘qnash keldi. Mirjalol Qosimov boshchilik qilayotgan O‘zbekiston terma jamoasi asosiy vaqtni 0:0 hisobida yakunlagan bo‘lsa-da, qo‘shimcha daqiqalarda 2 ta gol o‘tkazib yubordi. Uchrashuvni Al-Mirdasiy boshqarib borgandi.
Oradan bir yil o‘tib, 2016-yilning 13-yanvar kuni saudiyalik hakam O‘zbekiston va Janubiy Koreya olimpiya termalari ishtirokidagi o‘yinda ishladi. Osiyo Chempionati guruh bosqichi doirasidagi o‘yinda koreyaliklar 2:1 hisobida zafar quchdi. O‘sha mag‘lubiyatdan keyin Samvel Babayan boshchilik qilgan O‘zbekiston olimpiya terma jamoasining Rio—2016 Olimpiadasida ishtirok etmasligi aniq bo‘ldi.
Ma’lumot uchun, Samvel Babayan qabul qilib olguniga qadar ham O‘zbekiston olimpiya terma jamoasi Fahad Al-Mirdasiy boshqargan ikki bellashuvda ishtirok etgandi. Osiyo Chempionatining saralashida Bangladesh 4:0 hisobida mag‘lub etilgan, hal qiluvchi o‘yinda esa Suriyaga imkoniyat boy berilgan — 1:2.
Janubiy Koreya va O‘zbekiston milliy terma jamoalarining JCh—2018 yo‘lidagi to‘qnashuvi 15-noyabr kuni Seuldagi “World cup stadium”da Toshkent vaqti bilan 16:00 da start oladi.
Batafsil | Подробно | Read more... Daryo