Hotamjon Ketmonov Samarqanddagi uchrashuvda sud qarorlari ijrosi sifatini oshirish bo‘yicha chora-tadbirlar ishlab chiqishga chaqirdi

O‘zbekiston Respublikasi prezidentligiga O‘zXDPdan ko‘rsatilgan nomzod Hotamjon Ketmonov 14-noyabr, dushanba kuni Samarqand viloyati saylovchilari bilan uchrashdi. Viloyat hokimligining majlislar zalida onlayn video-konferensiya shaklida tashkil etilgan uchrashuvda barcha tumanlardagi saylovchilar bevosita ishtirokchi bo‘ldi. Bu haqda “Daryo”ga partiya matbuot xizmati xabar bermoqda.

Foto: O‘zXDP matbuot xizmati

Tadbirni Oliy Majlis Qonunchilik palatasi deputati Abdug‘affor Qirg‘izboyev ochdi va olib bordi. Nomzodning ishonchli vakili, Oliy Majlis Qonunchilik palatasi deputati Sahobiddin Arziqulov Hotamjon Ketmonovning tarjimai holi bilan yig‘ilganlarni tanishtirdi. Shundan so‘ng so‘z O‘zbekiston Respublikasi Prezidentligiga nomzodga berildi.
Hotamjon Ketmonov saylovoldi dasturi bilan yig‘ilganlarni tanishtirdi. Xususan, ijtimoiy ahamiyatga molik tovarlar va xizmatlar narxini shakllantirish ustidan davlat va jamoatchilik nazorati samaradorligini yanada oshirish orqali narxlar va tariflarning o‘sishi inflyatsiya darajasidan yuqori bo‘lmasligini ta’minlash, davlat mulkini xususiylashtirishdan olinadigan mablag‘ning bir qismini turar-joy fondini shakllantirishga yo‘naltirish mexanizmini takomillashtirish masalalariga e’tiborni kuchaytirish haqida to‘xtaldi.
Shuningdek, avtotransport vositalari ko‘payib borayotganligi natijasida yo‘llar, katta shaharlar ko‘chalarida tirbandliklar vujudga kelishiga barham berish maqsadida tegishli infratuzilmani doimiy takomillashtirib borish, piyodalar yo‘laklarini kapital ta’mirlash, ekologik toza, sog‘lom turmush tarziga zamin yaratuvchi veloyo‘laklarni qurish zarurligini ta’kidladi.
Jamiyatning barcha a’zolarining ishonchli ijtimoiy kafolatlari ta’minlanishi masalalarida biznes mas’uliyatini oshirish lozimligi, bu vazifani ro‘yobga chiqarishda “Kuchli ijtimoiy himoya – asosiy maqsadimiz!” shioriga tayanilishi haqida so‘z bordi.
Shundan so‘ng ma’ruza yuzasidan bir qator ishtirokchilar so‘zga chiqdi. Ular o‘z chiqishlarida nomzod dasturida ilgari surilayotgan inklyuziv ta’lim tizimini yanada rivojlantirish va soha o‘qituvchilariga imtiyozlar berish, jismoniy imkoniyati cheklangan talabalarning oliy o‘quv yurtlarida ta’lim olish imkoniyatlarini yanada kengaytirish, pedagogik ma’lumotga ega, lekin bola tarbiyasi bilan mashg‘ul bo‘lgani bois vaqtincha ishlamaydigan ayollarning oilaviy maktabgacha ta’lim tarbiyachisi sifatidagi uy mehnatini tashkil etishning qonuniy asoslarini yaratish masalalarini qo‘llab-quvvatladi.
Nomzod saylovoldi dasturida sud qarorlari ijrosi sifatini oshirish bo‘yicha chora-tadbirlar ishlab chiqish, sudlarda ishlarni ko‘rib chiqish jarayoniga axborot-kommunikatsiya texnologiyalarini keng tatbiq etish, fuqarolarning sudga murojaat qilishi va sud hujjatlarini olishining elektron tizimini keng joriy qilish bo‘yicha bildirgan takliflarini ijobiy baholadi.
Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo