Qirg‘izistonda amerikalik 1 mln dollar tovon puli uchun o‘z o‘limi haqida qalbaki hujjat tayyorladi

AQSh fuqarosi Qirg‘iziston janubida 1 million dollar hajmida sug‘urta to‘lovini qo‘lga kiritish uchun o‘zining o‘limi haqida qalbaki hujjat tayyorladi, deb yozadi “TASS” Qirg‘iziston ichki ishlar vazirligiga tayanib.

Foto: “Tvc.ru”

U O‘sh viloyatining Karasuy tumanidagi qabristonda soxta dafn marosimini o‘tkazib, hatto qabr toshi ham qo‘ydi. Shundan so‘ng uning qarindoshlari sug‘urta kompaniyalari va diplomatik vakolatxonalarga borib, kompensatsiya talab qila boshladi.
Qirg‘izistonga kelgan Amerika sug‘urta kompaniyasi vakillariga “marhum”ning do‘st va qarindoshlari qabr toshini va vafot etganlik haqidagi ma’lumotnomani ko‘rsatdi.
31 yoshli xorijlikning ism-sharifi oshkor etilmayapti. U o‘tgan o‘n yillik boshidayoq AQShga doimiy yashash uchun jo‘nab ketgani ma’lum. Vafoti to‘g‘risidagi ma’lumotnomani u registratsiya hujjatlaridagi qaydlarni soxtalashtirish orqali qo‘lga kiritgan. Unga O‘sh viloyatidagi kasalxonalardan birining shifokori yordam bergani taxmin qilinmoqda.
Xorijlikka nisbatan jinoyat ishi qo‘zg‘atilib, xalqaro qidiruvga berildi.
Batafsil | Подробно | Read more... Daryo