Sarvar Otamuratovning Toshkent viloyati saylovchilari bilan uchrashuvi bo‘lib o‘tdi

2016-yil 18-noyabr kuni O‘zbekiston “Milliy tiklanish” demokratik partiyasidan O‘zbekiston Respublikasi Prezidentligiga nomzod Sarvar Otamuratovning Toshkent viloyati saylovchilari bilan uchrashuvi bo‘lib o‘tdi. Uchrashuv viloyatning barcha tuman va shaharlaridagi saylovchilar bilan onlayn videokonferensaloqa tarzida tashkil etildi. Bu haqda “Daryo”ga O‘zMTDP Toshkent viloyati Kengashi Axborot xizmati xabar berdi.

Foto: O‘zbekiston “Milliy tiklanish” demokratik partiyasi

Uchrashuvni Xalq deputatlari Toshkent viloyati Kengashidagi O‘zbekiston “Milliy tiklanish” demokratik partiyasi guruhi rahbari Abdujabbor Saydullayev ochib berdi. Nomzodning Toshkent viloyatidagi ishonchli vakili Shuhrat Nasimov ishtirokchilarga Sarvar Otamuratovni tanishtirar ekan, uning tarjimai holiga batafsil to‘xtaldi. Shundan so‘ng, O‘zbekiston Respublikasi Prezidentligiga nomzod Sarvar Otamuratov saylovoldi Dasturi yuzasidan nutq so‘zladi.
O‘zbekiston “Milliy tiklanish” demokratik partiyasidan O‘zbekiston Respublikasi Prezidentligiga nomzod Sarvar Otamuratov bevosita saylovoldi Dasturda belgilangan vazifalarga saylovchilar e’tiborini qaratar ekan, tarixiy, madaniy, boy ma’naviy-axloqiy qadriyatlar va an’analar asosida jamiyatda yuksak huquqiy va siyosiy madaniyatni mustahkamlash hamda ma’naviy yuksalishga erishish masalalariga ustuvor ahamiyat qaratilganini ta’kidladi.
Nomzod uchrashuvda aytib o‘tganidek, ishlab chiqarishga yo‘naltirilmagan xarajatlarni qisqartirish, mahalliy sanoat samaradorligini yanada oshirishning huquqiy asoslarini izchil takomillashtirishga erishish lozim. Xorijiy mahsulotlar o‘rnini bosadigan mahsulotlarni ishlab chiqarayotgan mahalliy ishlab chiqaruvchilarni samarali qo‘llab-quvvatlash orqali milliy bozorni sifati past, xalqaro andozalarga mos kelmaydigan mahsulotlardan muhofaza etish zarur.
Shuningdek, Sarvar Otamuratov milliy iqtisodiyot rivoji yetuk mutaxassis-kadrlarga bog‘liq ekanligini hisobga olgan holda, zamonaviy bilim va malakaga ega injener-texnik, moliya-iqtisod, korporativ boshqaruv menejmentlari, axborot texnologiyalari sohasida dasturchilarni tayyorlashni tubdan kuchaytirish taklifini ilgari surdi.
O‘zbekiston “Milliy tiklanish” demokratik partiyasidan nomzodning saylovoldi Dasturida milliy manfaatlarni himoyalash va ilgari surish, barqaror milliy rivojlanishni ta’minlash, yuksak ma’naviy-intellektual taraqqiyotga erishish uchun mamlakatni modernizatsiya qilish masalasiga e’tibor qaratilgan.
Xususan, milliy axborot tizimlari va milliy axborot resurslarini rivojlantirish, rivojlangan milliy axborot makoni – mustahkam taraqqiyot poydevori ekanligini hisobga olib, uni izchillik bilan takomillashtirish muhim masala hisoblanadi.
Uchrashuvda nomzod O‘zbekistonning barcha hududlari qatori Toshkent viloyatida ham ma’naviy-ma’rifiy, siyosiy va sud-huquq, ijtimoiy va iqtisodiy sohalarda amalga oshirilayotgan ishlarni yangi bosqichga ko‘tarish, olib borilayotgan islohotlarning samaradorligini oshirish, o‘z yechimini kutayotgan masalalarni ijobiy hal etish hamda foydalanilmayotgan imkoniyatlarni to‘liq hayotga tatbiq etish yuzasidan o‘z takliflarini bildirdi.
Uchrashuvda nomzodning saylovoldi Dasturini qo‘llab-quvvatlab Olmaliq shahar “Hunarmandlar” uyushmasi raisi M.O‘lmasova, mehnat faxriysi N.Jo‘raboyev va boshqalar so‘zga chiqdi.
Batafsil | Подробно | Read more... Daryo