Andrey Shvedov: Nodavlat kanallarni saylovni yoritishga jalb etilishi saylov jarayoni, davlat rahbari lavozimiga da’vogarlik qilayotgan nomzodlar haqida ko‘proq bilish imkonini beradi

“O‘zbekiston Respublikasi Prezidenti saylovini yoritishda mamlakat nodavlat teleradiostudiyalari tomonidan xalqaro standartlarning qo‘llanilishi: milliy tajriba va dunyo amaliyoti” mavzusidagi xalqaro davra suhbati “Prezident saylovi mamlakat nodavlat teleradiostudiyalari tomonidan qanday yoritilmoqda?”, “Mamlakatdagi mustaqil studiyalar xalqaro standartlarga rioya etyaptimi?”, “Targ‘ibot faoliyati davomida partiyalar va nomzodlarning huquqlari buzilmayaptimi?” kabi savollar bilan ochildi. Bu haqda “Daryo”ga O‘zbekiston Elektron OAV milliy assotsiatsiyasi matbuot xizmati ma’lum qildi.

Foto: O‘zEOAVMA

Mahalliy va Bolgariya, Germaniya, Latviya, Litva, Daniya, Fransiya hamda boshqa mamlakatlardan tashrif buyurgan xalqaro ekspertlar, shuningdek, O‘zEOAVMAning tadbir bo‘yicha hamkorlari — Markaziy saylov komissiyasi, Konrad Adenauer nomidagi fondning mintaqaviy vakolatxonasi, YuNESKOning O‘zbekistondagi vakolatxonasi, partiyalar, davlat va jamoat tashkilotlari vakillari anjumanda mana shu va boshqa savollarga javob izladi.
Markaziy saylov komissiyasi hamda assotsiatsiya tomonidan Prezident saylovini yoritish to‘g‘risidagi ikki tomonlama bitim imzolangandan keyin nodavlat teleradiostudiyalar jurnalistlari so‘nggi yillarda davlat TVga jiddiy raqobat tug‘dirgan va rekord darajaga yetgan media-kontent miqdori to‘g‘risidagina emas, balki saylov mavzusidagi kontentning sifati va uning xalqaro standartlarga mos bo‘lishi haqida ham jiddiy o‘yladi. Buni Latviyaning “Telegraf” jurnali bosh muharriri Andrey Shvedov shunday sharhlaydi:

Foto: O‘zEOAVMA

“Nodavlat televideniye va O‘zbekiston Markaziy saylov komissiyasi o‘rtasida imzolangan bitimni juda muhim, deb hisoblayman. Nodavlat kanallarni saylovni yoritishga jalb etilishi O‘zbekiston saylovchilariga saylov jarayoni, davlat rahbari lavozimiga da’vogarlik qilayotgan nomzodlar haqida ko‘proq bilish imkonini beradi. Bu yerda men Rigadan, Latviya, saylovlarni yoritgan bizning mass-mediadan hech bir farqni ko‘rmayapman. Menimcha, bu yerda hamma jihatlarga to‘la rioya qilinmoqda, qolgani esa Prezidentlikka nomzodlarning o‘zlariga bog‘liq. Agar mag‘lubiyatga uchragan nomzod OAV ustidan shikoyat qiladigan bo‘lsa, bu OAVning aybi emas. Hozirgi holatda OAV vaziyatni mutlaqo haqqoniy aks ettirmoqda, qolganini saylovlar ko‘rsatadi”.
Saylov mavzusidagi kontentlarni boyitish maqsadida so‘nggi bir necha oy davomida taniqli xalqaro ekspertlar ishtirokida jurnalistlarning saylov mavzusi bo‘yicha kasbiy mahoratini oshirishga qaratilgan 8 ta seminar-trening o‘tkazildi.
Hozirga qadar 450ga yaqin media-mahsulot tayyorlanib, respublikadagi nodavlat teleradiostudiyalar efiriga 2 ming martadan ortiq uzatildi. Saylovning mohiyati va ahamiyatini, asosiy qoidalar va ovoz berish tartibi, saylov uchastkalari faoliyati va boshqa masalalarni tushuntirish maqsadida 40 dan ortiq ijtimoiy roliklar tayyorlandi va ular 4,5 ming martadan ortiq efirga berildi.
Nodavlat sektor bu masalada an’anaga ko‘ra, xalqaro tajribaga e’tibor qaratdi. Assotsiatsiya yosh jurnalistlarni o‘qitish uchun chet eldan media-sohaning eng yaxshi xalqaro ekspertlarini taklif qildi.
YuNESKOning katta maslahatchi va konsultanti, xalqaro tashkilotning so‘z erkinligi bo‘yicha bo‘limi sobiq direktori Mogens Shmidt (Daniya) quyidagilarni ta’kidladi:

Foto: O‘zEOAVMA

“O‘zbekistonda saylovlarni yoritish jarayonida va OAV faoliyatida ham ko‘plab xalqaro ekspertlarning qatnashayotgani favqulodda muhim hisoblanadi. Masalan, men o‘zim Daniyadanman. Avstraliya, Fransiya, Germaniya, Latviya, Litvadan ham ekspertlar bor.
Ya’ni, shu yo‘sinda, turlicha tajribaga ega bo‘lgan barcha ekspertlarni bir mamlakatga to‘plash orqali O‘zbekiston jurnalistlari tajribasini, kasbiy tajribasini boyitish imkoniyati paydo bo‘ladi”.
Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo