Final. “Nasaf” ustozi jamoa Gevorkyanga bog‘lanib qolmagani haqida aytdi, “Lokomotiv” murabbiyi esa “Nasaf”ni eng xavfli deb atadi

Ertaga — 30-noyabr kuni futbol bo‘yicha O‘zbekiston Kubogining final uchrashuvi bo‘lib o‘tadi va unda Toshkentning “Lokomotiv” klubi Qarshining “Nasaf” jamoasi bilan bellashadi.

Foto: O‘FF

Uchrashuv oldidan har ikki klub bosh murabbiylari matbuot anjumanida ishtirok etdi, deb yozdi “Championat.asia”.
Ro‘ziqul Berdiyev — “Nasaf”

Foto: O‘FF

“Kubokning amaldagi egasi sifatida uni himoya qilishni istaymiz. Biz ‘Lokomotiv’ga qarshi chempionat o‘yinlarida munosib o‘ynadik va har qanday raqib bilan bellashishga tayyorligimizni isbotladik. Ertangi o‘yinga atab tuzilgan rejamiz bor. Futbolchilarni ruhan yaxshi tayyorladik”.
“‘Nasaf’ Artur Gevorkyanga ham, Dragan Cheranga ham bog‘lanib qolmagan. Biz jamoaviy futbol ko‘rsatamiz va hech kimga bog‘lanib qolmaymiz”.
Andrey Miklyayev — “Lokomotiv”

Foto: O‘FF

“‘Nasaf’ biz uchun eng qiyin raqib. ‘Bunyodkor’ va ‘Paxtakor’ bilan ham o‘ynadik. Ammo Qarshi klubi ko‘proq tashvish tug‘dirdi. Chempionat doirasidagi o‘yinda ular ikki daqiqa ichida ikkita gol urishdi. Bu esa ko‘p narsadan dalolat beradi”.
“Penaltilar seriyasiga atayin tayyorgarlik ko‘rmadik. Yaxshi niyatda kelganmiz”.
“Nasaf” — “Lokomotiv” klublari o‘rtasidagi Samarqandda bo‘lib o‘tadigan O‘zbekiston Kubogi finali 13:00 dan boshlab “Sport” telekanalida namoyish etiladi. Ertangi bellashuvda “Nasaf” ko‘k, “Lokomotiv” esa qizil rangli libosda harakat qiladi.
Batafsil | Подробно | Read more... Daryo