Nazarboyev braziliyalik futbolchilarni olib ketayotgan samolyot halokati yuzasidan ta’ziya bildirdi

Qozog‘iston prezidenti Nursulton Nazarboyev o‘zining braziliyalik hamkasbi Mishel Temerga Kolumbiyada bortida “Shapekoense” futbol klubi a’zolari bo‘lgan layner halokati munosabati bilan ta’ziya telegrammasini jo‘natdi, deb yozadi “TASS” Qozog‘iston yetakchisi matbuot xizmatiga tayanib.

Foto: Reuters

Telegrammada ta’kidlanishicha, Nazarboyev “Kolumbiya Respublikasi havo hududida  sodir bo‘lgan aviahalokat natijasida Braziliya fuqarolari qurbon bo‘lgani haqidagi qayg‘uli xabarni qattiq achinish bilan qabul qilgan”.
“Judolik dardiga hamdard bo‘lgan holda, Qozog‘iston xalqi va shaxsan o‘zimning  nomimdan marhumlarning qarindoshlari va yaqinlariga, shuningdek, butun Braziliya xalqiga ta’ziya bildiraman”, — deyiladi matnda.
“Shapekoense” futbolchilari 1-dekabr kuni Kopa Sudamerikano – Janubiy Amerika mintaqasi klublari o‘rtasidagi Kopa Libertadores turniridan keyin nufuzi jihatdan ikkinchi o‘rinda turadigan musobaqasi doirasida “Atletiko Nasyonal” klubiga qarshi maydonga tushishi kerak bo‘lgan.
So‘nggi ma’lumotlarga ko‘ra, Kolumbiyadagi aviahalokat oqibatida qurbon bo‘lganlar soni 75 kishiga  yetdi .
Braziliyada aviahalokat qurbonlari xotirasiga motam  e’lon qilindi .
Batafsil | Подробно | Read more... Daryo