Qozog‘istonda 2011-yildan beri birinchi marta amnistiya e’lon qilinadi

Qozog‘istonda kelgusi yilning 6 oyi davomida amnistiya amalga oshiriladi. Bu haqda mamlakat parlamenti quyi palatasi — Majlis yig‘ilishida Qonunchilik va sud-huquq islohoti qo‘mitasi raisi Nurlan Abdirov ma’lum qildi, deya xabar beradi “TASS”. 

Foto: “Alau”

“Qozog‘iston Respublikasi mustaqilligining 25 yilligi munosabati bilan amnistiya to‘g‘risida”gi qonun loyihasi prezident Nursulton Nazarboyev tashabbusi bilan tayyorlangan va 29-noyabr, seshanba kuni parlamentga kiritilgandi. Unda ijtimoiy himoyaga muhtoj fuqarolar, voyaga yetmaganlar, homilador va qaramog‘ida voyaga yetmagan bolalari bor ayollar, keksalar, nogironlar, shuningdek, og‘ir bo‘lmagan jinoyatlarni sodir etgan shaxslarning jinoiy javobgarlikdan ozod etilishi ko‘zda tutilgan.
“Qonun loyihasiga ko‘ra, uning ijrosi joriy etilganidan boshlab 6 oy mobaynida amalga oshiriladi. Qonun joriy yil 16-dekabrdan kuchga kiradi”, — deya ta’kidladi Abdirov. 
Ma’lumot uchun, Qozog‘istonda oxirgi bor amnistiya 2011-yilda, mamlakat mustaqilligining 20 yilligi munosabati bilan o‘tkazilgandi.
Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo