Dzyudo bo‘yicha Toshkent Gran-Prisining birinchi kunida O‘zbekiston termasi 2 ta medalga sazovor bo‘ldi

1-oktabr kuni Toshkentdagi “O‘zbekiston” sport saroyida dzyudo kurashi bo‘yicha Gran-Pri turkumiga kiruvchi yirik xalqaro turnir boshlandi. Mazkur nufuzli musobaqada dunyoning 52 davlatidan 355 nafar sportchi jami 14 ta vazn toifasida sovrinli o‘rinlar uchun kurash olib bormoqda, deb xabar beradi “Olamsport”.

Foto: “Olamsport”

Musobaqaning ilk kuni erkaklar 60 va 66 kg vazn toifasida tatamiga chiqdi. 60 kg vazn toifasida O‘zbekiston sharafini himoya qilgan Sharofiddin Lutfullayev finalga qadar mag‘lubiyatsiz yetib keldi. Hal qiluvchi bahsda u yaponiyalik Yuma Oshimaga imkoniyatni boy berib, kumush medal bilan taqdirlandi. Ushbu vazn toifasida tatamiga chiqqan yana bir o‘zbekistonlik dzyudochi Diyorbek O‘rozboyev esa bronza medaliga sazovor bo‘ldi.
Lutfullayev finalga qadar yamanlik Ali Xusrov, turkiyalik Axmet Kaba, yarim finalda qirg‘izistonlik Otar Bestayevni mag‘lubiyatga uchratdi. O‘rozboyev esa aynan Bestayevga imkoniyatni boy bergan edi. Bronza medali uchun kechgan bahsda u avvaliga Axmet Kabani, keyin turkiyalik Beker O‘zluni taslim etdi.
66 kg vazn toifasida ishtirok etgan Timur Xudoyqulov, Hamidjon Mo‘minov, Asadullo Bozorov va Dostonjon Xoliqulovlar saralash bahslaridayoq mag‘lubiyat alamini totib ko‘rdi. Xotin-qiz dzyudochilar o‘rtasidagi bahslarda ham O‘zbekiston terma jamoasi a’zolari Munira Karimova, Nodira Gulova (ikkisi ham 48 kg), Dildora Ubaydullayeva, Muqaddas Kubeyeva (ikkisi ham 52 kg), Shahzoda Usmonova, Dildor Shermetova (ikkisi ham 57 kg) mag‘lubiyatga uchradi.
Birinchi kungi bahslar yakuniga ko‘ra dzyudo vatani – Yaponiya terma jamoasi 2 ta oltin medali bilan peshqadamlik qilyapti. Janubiy Koreya terma jamoasi hisobida 1 tadan oltin va kumush medal bor. Mo‘g‘uliston va Turkmaniston terma jamoalari bir nafardan chempionga ega. Bittadan kumush va bronza medaliga ega bo‘lib turgan O‘zbekiston hozircha 7-o‘rinda.
Eslatib o‘tamiz, Toshkent Gran-Prisining mukofot jamg‘armasi 100 000 AQSh dollarini tashkil qiladi. Ushbu Gran-Pri musobaqasida 2016-yili Rio-de-Janeyro shahrida o‘tkaziladigan XXXI yozgi Olimpiya o‘yinlarining yo‘llanmalari uchun reyting ochkolar ham o‘ynalyapti. Musobaqada oltin medalga sazovor bo‘lgan sportchilar 300 reyting ochkosiga, ikkinchi o‘rin sohiblari 180, bronza medali sovrindorlari esa 120 reyting ochkolariga ega bo‘ladi.
Batafsil | Подробно | Read more... Daryo