Abu Shixada Mayn: O‘zbekistondagi Prezident saylovi adolatli, ochiq va demokratik ruhda o‘tishiga ishonamiz

O‘zbekiston Respublikasi Prezidenti saylovini kuzatish uchun mamlakatga xorijiy davlatlar va xalqaro tashkilotlar vakillari kelmoqda. O‘zA muxbiri saylov jarayonini yoritish uchun kelgan xorijlik jurnalistlarning fikrlari bilan qiziqdi . 

Foto: UZ24

Robert Fransev, Rossiya-1 va Rossiya-24 telekanallari jurnalisti: 
— Kasbim taqozosi bilan O‘zbekiston jurnalistlarining faoliyatini kuzatib boraman. Mamlakatingiz fuqarolari saylov qonunchiligidan, Prezidentlikka nomzodlar haqidagi ma’lumotlardan yaxshi xabardor. Bu O‘zbekiston Respublikasi Prezidenti saylovining demokratik, ochiqlik hamda oshkoralik tamoyillariga muvofiq o‘tishi va saylovchilarning o‘zlariga munosib nomzodni tanlashlariga keng imkoniyat yaratadi. 
Abu Shixada Mayn, Ummon sultonligining O‘zbekistondagi elchixonasi matbuot bo‘limi xodimi: 
— O‘zbekiston saylov qonunchiligi va tizimi yildan-yilga takomillashib bormoqda. Saylov kampaniyasining ilg‘or jihatlaridan biri Prezidentlikka nomzodlar uchun saylovoldi tashviqotini olib borishda teng imkoniyatlar yaratilganidir. Buni ommaviy axborot vositalaridagi tashviqot materiallari, ko‘chalarga o‘rnatilgan bannerlar misolida ham yaqqol ko‘rish mumkin. Birinchi marta ovoz beradigan fuqarolarga alohida e’tibor qaratilishi ham diqqatga sazovor. Yoshlarni mamlakat siyosiy hayotiga jalb qilish barqarorlikni mustahkamlashning muhim omillaridan biridir. O‘zbekistondagi Prezident saylovi adolatli, ochiq va demokratik ruhda o‘tishiga ishonamiz.
Leyla Orujova, Ozarbayjonning O‘zbekistondagi elchixonasi maslahatchisi: 
— O‘zbekiston saylov qonunchiligiga ko‘ra Markaziy saylov komissiyasiga saylovga tayyorgarlik ko‘rish va uni o‘tkazish bo‘yicha mutlaq vakolatlar berilgan. Bunday maqom saylovni tashkil etish va o‘tkazish jarayonida qonuniylikni ta’minlash, saylovchilarning o‘z xohish-irodasini erkin ifoda etishi uchun zarur shart-sharoitlar yaratishga xizmat qiladi. Saylov to‘g‘risidagi qonunlarda xalqaro tajriba va mamlakat amaliyoti hisobga olingan holda, saylov jarayonining barcha bosqichlarida siyosiy partiyalardan kuzatuvchilar, OAV vakillari, boshqa davlatlar, xalqaro tashkilotlardan kuzatuvchilar ishtirok etishi mustahkamlangani yuksak e’tiborga loyiq.
Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo