Xatamjon Ketmonovning ishonchli vakili kogonlik saylovchilar bilan uchrashdi

O‘zbekiston Xalq demokratik partiyasidan O‘zbekiston Respublikasi Prezidentligiga nomzod Xatamjon Ketmonovning ishonchli vakili R. Kozimova Kogon shahri va tumani saylovchilari bilan uchrashdi. Bu haqda O‘zA xabar bermoqda .

Foto: Markaziy saylov komissiyasi

Ishonchli vakil ishtirokchilarni Prezidentlikka nomzodning tarjimai holi va saylovoldi dasturi bilan tanishtirdi.
Dasturda mamlakatda ishlab chiqarilayotgan qishloq xo‘jaligi mahsulotlarini qayta ishlashda oilaviy tadbirkorlik va kasanachilikni rivojlantirish, korxonalar tasnifiga “o‘rta korxona” tushunchasini kiritish, ya’ni yirik, o‘rta va kichik korxonalar mezonlarini belgilash, kichik korxonalarning yiriklashishi va yanada rivojlanishiga xizmat qiladigan soliq va imtiyozlar tizimini ishlab chiqish taklifi ilgari surilgan.
Qurilish tashkilotlarining moddiy-texnik ta’minotini yaxshilash, sohaga yangi texnologiyalarni keng joriy qilish, malakali mutaxassislarni yollashga imkoniyat beruvchi sharoitlar yaratish maqsadida soliq yukini kamaytirish, yangi ish o‘rinlari yaratish, buning uchun muntazam o‘tkaziladigan ish o‘rinlari yarmarkalarini yanada kengaytirish, hududlarni ijtimoiy-iqtisodiy rivojlantirish dasturlarini tuzishda joriy va istiqboldagi taraqqiyot yo‘nalishlarini to‘g‘ri va aniq belgilab olishga alohida e’tibor qaratilgan.
Kasb-hunar kollejlari bitiruvchilarining o‘zini o‘zi mustaqil ish bilan ta’minlash hamda yakka tartibdagi mehnat va tadbirkorlik faoliyatini rag‘batlantirish uchun maqbul sharoitlar yaratish maqsadida imtiyozli mikrokreditlar ajratish amaliyotini kengaytirish, o‘z biznesini ochishda belgilangan yig‘imlardan, faoliyatini to‘liq yo‘lga qo‘ygunga qadar soliqlardan ozod qilish muddatini uzaytirish taklif etilgan.
Uchrashuvda Kogon shahridagi “Do‘stlik” mahalla fuqarolar yig‘ini raisi G. Suvonova, “O‘zbekiston temir yo‘llari” aksiyadorlik jamiyatining Buxoro lokomotiv deposi bosh hisobchisi Sh. Hojiyev, Kogon tumanidan partiya faoli I. Ergasheva va boshqalar Prezidentlikka nomzodning saylovoldi dasturi yuzasidan o‘z fikrini bildirdi.
Tadbirda saylovchilarni qiziqtirgan savollarga ishonchli vakil tomonidan javob qaytarildi.
Batafsil | Подробно | Read more... Daryo