Faxriddin Karatayev: Prezident saylovidan keyin O‘zbekistonning nufuzi yanada ortishiga ishonamiz

Prezident sayloviga tayyorgarlik ko‘rish va uni o‘tkazish jarayonini kuzatish uchun O‘zbekistonga kelgan xorijiy davlatlar va xalqaro tashkilotlar vakillari joylarda tashkil etilayotgan uchrashuvlar doirasida Oliy Majlis Qonunchilik palatasiga tashrif buyurdi. Bu haqda palata matbuot xizmati xabar bermoqda .

Foto: Wikipedia

Qonunchilik palatasi Xalqaro ishlar va parlamentlararo aloqalar qo‘mitasi a’zolari Z. Umarov va F. Eshmatovaning Qozog‘iston Respublikasi Parlamenti Majlisi (quyi palata) deputatlari F. Karatayev va K. Yerjan bilan muloqoti bo‘lib o‘tdi.
— Qo‘shni davlat sifatida xalqlarimiz o‘rtasida mustahkam aloqalar o‘rnatilgani bizga mamnuniyat bag‘ishlaydi. Kelishimizdan avvalroq Olmaotada tashkil etilgan saylov uchastkasida bo‘ldik. U yerda ham saylovga qizg‘in tayyorgarlik ko‘rilgan, — deydi Faxriddin Karatayev. — Qozog‘istonda ham ushbu saylovni intizorlik bilan kutayotganlar bor. Chunki, O‘zbekiston va Qozog‘istonning kelajagi qo‘shni davlatlar uchun katta ahamiyatga ega. Shunday ekan, bu ikki xalqni bir-biridan hech qachon ajratib bo‘lmaydi.
Saylovning demokratik tamoyillarga mos o‘tayotgani juda quvonchli. Prezidentlikka ko‘rsatilgan nomzodlarga saylovoldi tashviqotini olib borishlari, o‘z dasturlarini ilgari surishlari uchun teng shart-sharoit yaratilganiga guvoh bo‘ldik.
Televideniye orqali mamlakatingiz chekka hududlaridagi saylovoldi uchrashuvlarida jonli muloqotlar qizg‘in o‘tkazilganini ko‘rdik. Bu, albatta, aholini, ayniqsa, xotin-qizlar va birinchi marta ovoz berayotgan yoshlarni keng qamrab olishda muhim o‘rin tutadi.
Biz Toshkent va Samarqand viloyatlari, umuman aytganda ko‘proq hududlarda bo‘lib, u yerdagi saylov uchastkalari faoliyati bilan tanishmoqchimiz.
Saylovdan keyin O‘zbekistonning nufuzi yanada ortishi, parlamentlararo, xalqlarimiz o‘rtasidagi do‘stlik munosabatlari mustakamlanishiga ishonamiz.
Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo