Bosh vazir qabulxonasiga murojaatdan so‘ng Hamkorbank 34 mln so‘m ish haqini bir kunda to‘lab berdi

Bosh vazir qabulxonasiga murojaat etgan kompaniyalardan biri korxona va unga xizmat ko‘rsatuvchi Hamkorbank aksiyadorlik-tijorat banki Aviasozlar filiali o‘rtasida yuzaga kelgan muammoni hal etishda yordam berishni so‘rab, 30-noyabr kuni murojaat qildi .

Foto: Bosh vazir qabulxonasi

Murojaatda bank ish haqi bo‘yicha naqd pulni berishni doimiy kechiktirishi va bunga Markaziy bankda naqd mablag‘ yo‘qligini ro‘kach etishidan shikoyat qilingan. Mazkur muammo tufayli xodimlar ishdan bo‘shab ketayotgani va prokuraturaga ish beruvchi maoshni vaqtida to‘lamayotgani yuzasidan ariza yozayotgani bildirilgan. Buning dalili sifatida bank tomonidan qabul qilinmagan oktabr oyi uchun naqd pul cheki havola etilishi mumkinligi bayon qilingan.
Ushbu murojaat qabulxona tomonidan Hamkorbank’ka yo‘llangach, muammo qisqa vaqtda o‘z yechimini topdi. Bank boshqaruvi raisi N. Qodirov tomonidan kompaniyaga yozilgan javob xatida mazkur korxonaga 30-noyabr kunining o‘zida 34,4 million so‘m naqd ko‘rinishdagi ish haqi to‘lab berilgani ma’lum qilindi.
Kompaniya bank rahbariyatiga yo‘llagan maktubida masala tezkor ravishda hal etilgani uchun minnatdorlik izhor etilgan va kelgusida korxona xodimlari uchun ish haqi olishda bunday keskin choralarga hojat qolmasligiga umid bildirilgan.

Foto: Bosh vazir qabulxonasi

Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo