Bloomberg tahlilchilari Yevropadagi saylovlarni jahon barqarorligiga asosiy tahdid deb hisobladi

Donald Trampning AQSh prezidenti etib saylanishi, shuningdek, Yevropada bo‘lib o‘tadigan saylovlar 2017-yilda jahondagi barqarorlikka tahdid soladi. Bloomberg tomonidan intervyu qilingan 146 tahlilchi shunday fikrga keldi, deb xabar beradi Meduza.

Foto: KeyWordSuggest

Jumladan, ekspertlar fikricha, yaqin uch yilda Yevroittifoq davlatlaridan Gretsiyada siyosiy beqarorlik kutiladi. Bundan tashqari, Polsha va Buyuk Britaniyada millatchilarning mavqei oshishi tahdidli ko‘rinmoqda.
Fransiya va Germaniyada bo‘lib o‘tadigan saylovlar ham xavfli deya baholanmoqda. Ekspertlar Buyuk Britaniyada ham muddatidan ilgari saylov o‘tkazilishi mumkinligini istisno etmayapti.
Jahon barqarorligiga tahdid soluvchi ikkinchi omil sifatida ekspertlar AQSh prezidentligiga Donald Trampning saylanishini ko‘rsatdi. Trampning yirik korporatsiyalardan olinadigan soliqni tushirish rejalari ijtimoiy hayotdagi barqarorlikka jiddiy zarba bo‘lishi mumkin.
Shu bilan birga, ekspertlar Trampning qator saylovoldi va’dalari, jumladan, Meksika chegarasida devor qurish rejalari hech qachon amalga oshirilmasligini tan olmoqda.
Nihoyat, barqarorlikka tahdid sifatida Rossiya prezidenti Vladimir Putinning tashqi siyosati, Buyuk Britaniyaning Yevropa Ittifoqi tarkibidan chiqishi, global kiber urushlar, Xitoy rahbariyatidagi o‘zgarishlar aytildi.
Batafsil | Подробно | Read more... Daryo