“El-Klasiko”ni dunyoning 5 ta yirik shahrida katta ekranda namoyish etish orqali La Liga yaxshigina PR qilindi

Futbol bo‘yicha Ispaniya La Ligasi Yevropa qit’asida ketma-ket to‘rt mavsumdirki peshqadamlikni hech kimga bermaydi.

Foto: La Liga

Ispaniya klublari qolganlardan kuchliroq ekani natijalarda ko‘rindi. Oddiy misol, Yevropa Chempionlar Ligasi va Yevropa Ligasida ishtirok etayotgan Ispaniyaning barcha — yetti klubi ham guruh bosqichini muvaffaqiyatli bosib o‘tdi. Yevropa Ligasida “Sevilya”ning ketma-ket yurishlari, “Barselona”, “Real” va “Atletiko”ning Chempionlar Ligasidagi gegemonligiga qaramay, translyatsiyani sotish borasida La Liga Angliya Premyer-Ligasidan ortda qoladi.
Ispaniya La Ligasi bu borada Angliyadan o‘zib ketish uchun katta hajmdagi ishlarni boshladi. “Barselona” va “Real Madrid” ishtirokidagi o‘yinning Toshkent vaqti bilan 20:15 da boshlangani ham shu yo‘ldagi qadamdir. Eng katta bozor — Osiyoni egallash uchun La Liga jiddiy bel bog‘lagan. Bu vaqt Xitoy, Hindiston va Sharqiy Osiyoning qolgan mamlakatlari uchun ham ayni muddao edi.
La Liganing bugungi kundagi shiori shunday: muxlislar “El-Klasiko”ni ko‘rish uchun Ispaniyaga kela olmasa, “Klasiko”ning o‘zi ular tomon boradi. Xitoyning Pekin va Shanxay, Hindistonning Nyu-Deli hamda Mumbay, shuningdek, JAR poytaxti Yoxannesburg markazlarida “El-Klasiko” kuni katta ekranlar o‘rnatilib, shahar aholisi yilning eng qiziqarli o‘yinlaridan birini ko‘rishi uchun sharoit yaratildi. Shu kuni ekran ostida hayot qaynadi, muxlislar bayram qildi, savdogarlar molini sotish orqali foyda ko‘rdi va hokazo.
La Liga har bir shaharga yaqin o‘tmishning yulduz futbolchilarini bir hafat avval yuborib, o‘ziga xos PR kompaniya boshlagani e’tiborga molik. Buning ortidan Fernando Moriyentes Pekinga, Gaiska Mendyeta Shanxayga, Luis Garsiya Nyu-Deliga, Frederik Kanute Mumbayga, Krisian Karambyo esa Yoxannesburgga yo‘l oldi.

Foto: Mirror

Ispaniya La Ligasi bu ketishda Angliya Premyer-Ligasiga anchagina yaqinlashib olishi mumkinligi “Championat.asia” saytidagi maqolada yozilgan . Masalan, 3-dekabr kuni bo‘lib o‘tgan “Manchester Siti” — “Chelsi” o‘yini nisbatan qiziqarliroq o‘tdi, shunga qaramay “Barselona” — “Real Madrid” o‘yini ko‘proq muxlis jamg‘ara oldi.
Batafsil | Подробно | Read more... Daryo