Kichik biznes subyektlari eksportini qo‘llab-quvvatlash jamg‘armasi Shveysariyada vakolatxonasini ochadi

O‘zbekiston Kichik biznes va xususiy tadbirkorlik subyektlarining eksportini qo‘llab-quvvatlash jamg‘armasi Shveysariyada o‘z vakolatxonasiga ega bo‘ladi. Bu haqdagi kelishuv jamg‘arma vakillari hamda Jeneva diplomatik doirasi prezidenti Robert Blum o‘rtasida imzolandi, deb xabar beradi UzDaily.

Foto: UzDaily

Jamg‘armaning yangi vakolatxonasi O‘zbekiston tadbirkorlariga o‘z mahsulotlarini eksport qilish hamda Yevropa bozorini o‘rganish asosida ishonchli hamkorlarni topishda ko‘maklashadi.
Jamg‘arma, shuningdek, O‘zbekiston va Shveysariya ishbilarmon davralari o‘rtasidagi aloqalarni mustahkamlash, O‘zbekiston tadbirkorlarining Shveysariyada o‘tkaziladigan ko‘rgazmalar, yarmarkalar, tender savdolari va biznes forumlaridagi ishtirokini ta’minlashga yordam beradi.
Vakolatxona o‘zbekistonlik tadbirkorlarga Shveysariyada bojxona tekshiruvlaridan o‘tish uchun zarur bo‘lgan sertifikatlar, litsenziyalar va boshqa ruxsatnoma hujjatlar olishda ham ko‘mak beradi.
Jamg‘arma Janubiy Koreya, Rossiya, Ispaniya, Italiya va Bolgariyada o‘z vakolatxonalariga ega.
Batafsil | Подробно | Read more... Daryo