Toshkentda bodibilding va fitnes bo‘yicha Osiyo chempionati boshlandi

Toshkentdagi “Turkiston” san’at saroyida 2-oktabr, juma kuni bodibilding va fitnes bo‘yicha 49-Osiyo chempionati start oldi. Bu haqda “Gazeta.uz” xabar bermoqda .

Foto: “Gazeta.uz”

Musobaqalarning birinchi kunida jami 12 yo‘nalishning uchtasida qatnashgan o‘zbekistonlik sportchilar bitta oltin va bitta bronza medalini qo‘lga kiritdi. Xususan, o‘smirlar o‘rtasida 80 kilogrammgacha bo‘lgan vazn toifasida o‘smirlar orasida mutlaq jahon chempioni, O‘zbekistonning ko‘p karra chempioni Mixail Volinkin “oltin”ni qo‘lga kiritdi.

O‘zbekiston vakili Ziyodulla Ahmadaliyev — o‘ngdan ikkinchi. Foto: “Gazeta.uz”

Model-fizik yo‘nalishida bo‘yi 170 santimetrgacha bo‘lgan qatnashchilar orasida esa o‘zbekistonlik Ziyodulla Ahmadaliyev “bronza” medal sohibiga aylandi. Erkak bodibilderlar yo‘nalishida 60 kilogramm vazn toifasida musobaqalarda qatnashgan o‘zbekistonlik Diyorbek Matkarimov esa medallarni qo‘lga kirita olmadi.

Muhammad Nasim Qodiriy. Foto: “Gazeta.uz”

“Gazeta.uz”ning qayd etishicha, faxriy bodibilderlarning chiqishi o‘zbekistonlik tomoshabinlar uchun kutilmagan hol bo‘ldi. Mazkur yo‘nalishda xitoylik Jen Jin Sun birinchi, afg‘onistonlik Muhammad Nasim Qodiriy ikkinchi, hindistonlik Saxena Rajendra Kumar esa uchinchi o‘rinni egalladi.
Batafsil | Подробно | Read more... Daryo