“Lokomotiv” Chempionlar Ligasida BAAning “Al-Ahli” va Saudiyaning “At-Tavun” klublariga raqib bo‘ldi

Osiyo Chempionlar Ligasining 2017-yilgi mavsumi uchun qur’a tashlash marosimi bo‘lib o‘tdi.
Here it is! The official #ACL2017 Group Stage draw results! #TheAFC #OAOG #Football #Asia pic.twitter.com/4pfs5cXwYE
— The-AFC.com (@theafcdotcom) December 13, 2016

Musobaqaning guruh bosqichiga O‘zbekistondan faqatgina mamlakat chempioni “Lokomotiv” to‘g‘ridan-to‘g‘ri yo‘l olgan. “Nasaf” va “Bunyodkor” klublari esa buning uchun pley-off bosqichida ishtirok etishi kerak.
“Lokomotiv” 2017-yilgi mavsum “A” guruhida ishtirok etadi. Bu guruhdan, shuningdek, Amirliklarning “Al-Ahli”, Saudiyaning “At-Tavun” klublari joy oldi.

Foto: CA

Guruhdagi to‘rtinchi jamoa nomiga pley-off bosqichidan keyin oydinlik kiritiladi. Eronning “Istiqlol” va Qatarning “As-Sadd” klublari bu yo‘lda o‘zaro raqobat hosil qiladi.
Ma’lumot uchun, “Lokomotiv” bilan raqib bo‘lib ulgurgan “Al-Ahli” BAA chempionatida 3-o‘rinni egallab turibdi . “At-Tavun” esa Saudiya ligasida yettinchi pog‘onada bormoqda.
O‘zbekiston Oliy Ligasida 2-o‘rinni qo‘lga kiritgan “Bunyodkor” klubi pley-off bosqichidan muvaffaqiyatli o‘ta olsa, “C” guruhidan joy oladi. Buning uchun “qaldirg‘ochlar” Sardor Rashidov to‘p suradigan va Qatar Yulduzlar Ligasida peshqadam bo‘lib turgan “Al-Jaish”ni mag‘lub etishi kerak.

Foto: CA

Qarshining “Nasaf” klubi guruh bosqichiga qo‘shilishi uchun ikkita raqibni yengishi kerak: avvaliga “Al-Xidd” (Bahrayn), keyin esa “Al-Fateh” (Saudiya). Shundan so‘ng Qarshi klubi Chempionlar Ligasining “B” guruhiga qo‘shilishi mumkin bo‘ladi.

Foto: CA

Ma’lumot uchun, so‘nggi ikki mavsumda O‘zbekistonning 4 tadan klubi Osiyo Chempionlar Ligasining guruh bosqichida ishtirok etdi. “Paxtakor”, “Bunyodkor” va “Nasaf” har ikki safar ham guruh bosqichida qolib ketdi. “Lokomotiv” esa ikkinchi urinishda chorak finalga qadar yetib bordi.
O‘zbekiston klublarining Osiyo Chempionlar Ligasidagi eng yaxshi natijasi yarim final bo‘lib, “Paxtakor” 2003, “Bunyodkor” esa 2008 va 2012-yilgi mavsumlarda final ostonasiga qadar yetib borgan.
Batafsil | Подробно | Read more... Daryo