Toshkent tibbiyot akademiyasining rektori o‘zgardi

Toshkent tibbiyot akademiyasining rektori o‘zgardi. Oliy o‘quv yurtiga endilikda 46 yoshli tibbiyot fanlari doktori, professor Laziz To‘ychiyev boshchilik qiladi, deb xabar beradi “Gazeta.uz”.

Laziz To‘ychiyev. Foto: Sog‘liqni saqlash vazirligi

Bunga qadar Laziz To‘ychiyev 2014-yil yanvaridan buyon O‘zbekiston sog‘liqni saqlash vaziri o‘rinbosari lavozimida ishlab kelayotgan edi. Unga qadar — 1993–2010-yillarda u Toshkent tibbiyot akademiyasida faoliyat yuritgan. 2010-yilda Sog‘liqni saqlash vazirligi sanitariya-epidemiya nazorati Bosh boshqarmasi boshlig‘i etib tayinlangan, 2012-yildan esa epidemiologiya, mikrobiologiya va infeksion xastaliklar ilmiy-tadqiqot institutiga rahbarlik qilgan.
Toshkent tibbiyot akademiyasiga oxirgi o‘n yil davomida 71 yoshli Shavkat Karimov rahbarlik qilib kelgan edi.
Laziz To‘ychiyevning vazir o‘rinbosari lavozimidagi o‘rnini Elmira Bositxonova egalladi. U, o‘z navbatida, 13-dekabrga qadar O‘zbekiston xotin-qizlar qo‘mitasi raisi va Bosh vazir o‘rinbosari sifatida faoliyat yuritib kelayotgan edi.
Batafsil | Подробно | Read more... Daryo