Madridning “Real”i klublar o‘rtasidagi Jahon Chempionatida g‘olib chiqishda “Barselona”dan 2 taga ortda qolgan

Bugun — 15-dekabr kuni futbol bo‘yicha klublar o‘rtasidagi Jahon Chempionatida yarim finalning ikkinchi o‘yini o‘tkazilib, “Real Madrid” Meksikaning “Amerika” jamoasiga qarshi o‘yinda maydonga tushadi. Yarim finalning birinchisida zafar quchgan Yaponiyaning “Kashima Antlers” klubi Osiyo klublari orasida birinchi bor finalda o‘ynash huquqini qo‘lga kiritgan.

Foto: “Kashima Antlers” FK

Klublar o‘rtasidagi Jahon Chempionati finalida eng ko‘p bor “Barselona” ko‘rinish bergan. Kataloniya klubi o‘z tarixida 4 bor hal qiluvchi o‘yinda ishtirok etgan bo‘lib, shularning 3 tasida bosh sovringa ega chiqqan.
“Barselona” 2006-yilgi mavsum finalda Braziliyaning “Internatsional” klubidan 0:1 hisobida yengilgan bo‘lsa, 2009-yil Argentinaning “Estudiantes” jamoasini 2:1, 2011-yil Braziliyaning “Santos” klubini 4:0 va 2015-yil Argentinaning “River Pleyt” klubini 3:0 hisobida taslim qilgan.

Foto: “Barselona” FK

Jahon Chempionatida “Barselona”dan keyingi natija Braziliyaning “Korintians” klubiga tegishli. 2000-yil jamoa finalda “Vasko de Gama”ni taslim qilgan bo‘lsa, 2012-yil Londonning “Chelsi” klubini 1:0 hisobida mag‘lub etgan.

Foto: “Korintians” FK

Madridning “Real” klubi esa Jahon Chempionati finalida hozirga qadar 1 marta to‘p surgan. 2014-yilgi mavsum “qirollik klubi” Argentina yetakchisi “San Lorentso”ni 2:0 hisobida mag‘lub etgan.

Foto: “Real Madrid” FK

2016-yilgi mavsum chempionligini qo‘lga kiritishi uchun Zinedin Zidan jamoasi “Amerika” hamda “Kashima Antlers”ni mag‘lub etishi shart. Shunda u “Korintians”ning natijasini takrorlab, “Barselona”ga sovrinlar soni bo‘yicha yaqinlashib oladi.
“Real”ning “Amerika”ga qarshi o‘yini Toshkent vaqti bilan 15:30 da start oladi.
Ma’lumot uchun, jamoalari finalda ishtirok etishi borasida Braziliya peshqadam bo‘lib, uning 5 ta klubi JCh finalida to‘p surgan: “Korintians”, “Vasko de Gama”, “San Paulo”, “Internatsional”, “Santos”. Argentinaning esa “Boka Xuniors”, “Estudiantes”, “San Lorenso”, “River Pleyt” klublari finalda o‘ynagan va barchasi mag‘lub bo‘lgan.
Angliyada jamoalar soni 3 ta: “Chelsi”, “Yunayted” hamda “Liverpul”. Faqatgina “qizil iblislar”ga bosh sovrin nasib qilgan.
Batafsil | Подробно | Read more... Daryo