“Andijon” bilan 1-ligaga tushib ketgan Javlon Guseynov Tailand 1-ligasiga tushib ketgan klub bilan shartnoma imzoladi

O‘zbekistonlik futbolchi Javlon Guseynov faoliyatini Tailandda davom ettiradi. Bu haqda “Championat.asia” nashri xabar berdi.

Foto: CA

Uning yangi klubi “Chainat Xonbill” deb nomlanadi. Jamoa yakuniga yetgan Tailand chempionatida 18 klub orasida 17-o‘rinni egallab, quyi divizionga tushib ketgandi. Javlon Guseynov uni elitaga qaytarishga yordam beradi.
O‘z vaqtida Angliyaning “Liverpul” klubi bilan Yevropa Chempionlar Ligasida zafar quchgan fransiyalik futbolchi Floran Sinama Panyol ham “Chainat Xonbill” safida to‘p tepadi.

Foto: CA

Jamoada, shuningdek, yaponiyalik Kazuto Kushida, braziliyalik Reys, Renan Silva hamda Uesli Aleks kabi legionerlar bor.
Javlon Guseynov o‘zining so‘nggi mavsumini O‘zbekiston Oliy Ligasida muvaffaqiyatsiz ishtirok etgan “Andijon” klubida o‘tkazgandi. Uning Tailand klubi bilan shartnomasi qanchaga mo‘ljallangani haqida ma’lumot berilmagan.
Javlon Guseynov Tailand chempionatida to‘p surayotgan ilk o‘zbekistonlik futbolchi emas. So‘nggi bor Anvar Rajabov mamlakatning “Buriram Yunayted” futbol klubida o‘ynagan.
Batafsil | Подробно | Read more... Daryo