Xitoy–AQSh startapi Tesla’ga raqobatchi bo‘ladigan elektromobilni namoyish etdi

Xitoy–AQSh startapi — Lucid Motors kompaniyasi Air nomli elektromobil prototipini rasman namoyish qildi, deb xabar bermoqda Motor. Tesla Model S rusumli elektromobilga raqobatchi bo‘lishi kutilayotgan yangi mashinalar seriyasi 2018-yilda ishlab chiqarilishi ko‘zda tutilgan.

Foto: Motor

Lucid Air ikkita elektr agregat bilan jihozlangan: biri old, ikkinchisi orqa qismdagi o‘qqa o‘rnatilgan. Mazkur avtomobil 2,5 soniya ichida 96 kilometrgacha tezlik olishi mumkin. Uning maksimal tezligi esa soatiga 315 kilometrni tashkil etadi.

Foto: Motor

Xaridorlarga akkumulyator hajmi 100 va 130 KVt/soat bo‘lgan komplektdagi elektrokarlar taklif qilinadi. Hajmi soatiga 130 kilovatt bo‘lgan mashina qayta quvvatlanishsiz 643 kilometrgacha masofani bosib o‘tishi mumkin. Taqqoslash uchun, xuddi shunday hajmdagi Tesla Model S 506 kilometr masofani bosib o‘tadi.

Foto: Motor

Yangi avtomobil “haydovchisiz haydashga tayyorgarlik” to‘plami bilan jihozlangan bo‘lib, u kichik radiusli radar, videokamera va uzoqni o‘lchaydigan optik asbob – LIDAR’ni o‘z ichiga oladi.

Foto: Motor

Lucid Motors kompaniyasi Air elektrokarlarini ishlab chiqarish uchun 2017-yili AQShning Arizona shtatida o‘z korxonasini tashkil qilmoqchi. Unga 700 million dollar investitsiya qilinadi. 2018-yili kompaniya 250 ta elektromobil ishlab chiqarishni rejalashtirgan. Keyinroq ishlab chiqarish hajmi oshiriladi.

Foto: Motor

Lucid Air elektromobilining taxminiy narxi 100 mingdan 160 ming dollargacha bo‘ladi. Keyinchalik kompaniya narxi 65 ming dollar bo‘lgan elektromobil seriyasini ham ishlab chiqarmoqchi.
Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo