“Buxoro”da tanilgan moldovalik Vadim Chemirtan legionerlardan yolchimagani aytilgan “Bunyodkor” safida shug‘ullanmoqda

Oliy Liganing 2016-yilgi mavsumi ikkinchi yarmini “Buxoro” futbol klubida o‘tkazgan moldovalik futbolchi Vadim Chemirtan yangi mavsumga tayyorgarlikni “Bunyodkor” safida boshladi. Bu haqda “Championat.asia” nashri xabar berdi .

Foto: CA

Chemirtan “qaldirg‘ochlar” bilan og‘zaki kelishuvga erishgani uchun ham “Bunyodkor” safida mashg‘ulot olib bormoqda. U “Buxoro” safidagi 11 ta o‘yinida 8 ta gol urib, jamoasining kuchli to‘rtlikka kirishiga hissa qo‘shgandi. Hujumchi hozir 29 yoshda.
Avvalroq “Bunyodkor” klubi bosh direktori Baxtiyor Boboyev intervyu berib, jamoasi 2016-yilgi mavsum legionerlardan yolchimagani haqida aytib o‘tgandi . Natijada Shaker Zuagi (Tunis), Aleksandar Alimpiyevich (Serbiya), Minori Sato (Yaponiya), Yuritsa Bulyat (Xorvatiya) kabi futbolchilarga javob berib yuborilgandi.
Vadim Chemirtanning “Bunyodkor” safiga yo‘l olayotgani “Buxoro” futbol klubi muxlislariga xush kelmayotganini ularning ijtimoiy tarmoqlarda qoldirayotgani fikrlaridan ham bilish mumkin . Ular orasida Chemirtan uchun pul yig‘ib berishga tayyorlari ham bor.

Foto: CA

Ma’lumot uchun, “Buxoro” kelasi mavsum uchun xalqaro maydonga yo‘l ola bilmagan. “Bunyodkor” esa Osiyo Chempionlar Ligasining pley-offida ishtirok etadi . Guruh bosqichiga chiqishi uchun klub Sardor Rashidov to‘p suradigan Qatarning “Al-Jaish” klubini mag‘lub etishi kerak bo‘ladi.
Batafsil | Подробно | Read more... Daryo