Netanyaxu BMTning noqonuniy manzilgohlar yuzasidan rezolyutsiyasini “urush e’lon qilinishi” deb atadi

Isroil bosh vaziri Binyamin Netanyaxu Yangi Zelandiya tashqi ishlar vaziri Marrey Makkallini manzilgohlar bo‘yicha Isroilga qarshi rezolyutsiyaga ovoz berish “urush e’lon qilish” sifatida qabul qilinishi haqida ogohlantirgan, deya xabar bermoqda “TASS”.

Foto: EPA

Yahudiy davlati hukumati rahbari diplomatga BMTda ovoz berish boshlanishidan bir necha soat avval qo‘ng‘iroq qilgan. Haaretz gazetasi G‘arb diplomatik tuzilmalariga tayanib yozishicha, suhbat “keskin” bo‘lgan. “Agar siz ushbu mojaroli qarorni qo‘llab-quvvatlasangiz, biz buni urush e’lon qilish deb qabul qilamiz. Biz munosabatlarni uzib, Yangi Zelandiyadan elchilarni chaqirib olamiz”, — degan Netanyaxu.
Suhbat baland ohangda kechganiga qaramay, Makkalli rezolyutsiya mamlakat siyosatiga mos kelishi va shu sababli qo‘llab-quvvatlanishini ta’kidlagan.
BMT Xavfsizlik Kengashi 23-dekabr kuni ko‘pchilik ovoz bilan qabul qilgan rezolyutsiya Isroildan Falastinning okkupatsiya qilingan hududlarida manzilgohlar qurib, u yerga yahudiylarni ko‘chirish xatti-harakatlarini zudlik bilan to‘xtatish talab qiladi.
Keyinroq Isroil bosh vaziri Binyamin Netanyaxu BMT Xavfsizlik Kengashiga a’zo 12 mamlakat elchixonalari bilan aloqalarni muzlatib qo‘yishga ko‘rsatma berdi. Bular Isroilni Falastinning bosib olingan yerlarida yahudiy manzilgohlarini qurishni to‘xtatishga chaqiruvchi rezolyutsiyani ma’qullagan  Buyuk Britaniya, Fransiya, Rossiya, Xitoy, Yaponiya, Ukraina, Angola, Misr, Urugvay, Ispaniya, Senegal va Yangi Zelandiyadir.
Batafsil | Подробно | Read more... Daryo