Fazliddin G‘oibnazarov: Mukofot pullarimni ustozimga chin dildan beraman, u esa doim o‘zimga qaytaradi

Rio—2016 Olimpiadasi qahramonlaridan biri Fazliddin G‘oibnazarov sportda qo‘lga kiritgan mukofot pullarining barchasini ustozi Abror Tursunpo‘latovga berganini qayd etib o‘tgandi . Keyinroq sportchi bu vaziyatni “Daryo”ga izohlab berdi.

Foto: Getty Images

Fazliddin G‘oibnazarovning qayd etishicha, u sportdagi muvaffaqiyatlarida asosiy rolni o‘ynaydigan ustoziga to‘liq ishonadi va juda hurmat qiladi.
Abror aka muvaffaqiyatlarimga juda katta hissa qo‘shgan inson. Shu boisdan ham mukofotlarimning hammasiga men bilan teng haqli. Men har safar qo‘lga kiritgan yutug‘imni u kishiga olib boraman. Bunda ularning hissalari katta ekanini qayd etib, rahmat aytaman. Biroq ustozim pulni qanday bo‘lsa, shunday qaytaradi yoki mening kelajagim uchun sarflaydi, oilamga ko‘mak berishga harakat qiladi, maslahatini ayamaydi. Uni esdan chiqarmasligimning o‘zidan quvonishini aytadi.
Fazliddin G‘oibnazarov, Rio—2016 Olimpiadasi chempioni
G‘oibnazarovning so‘zlariga ko‘ra, u va ustozining o‘rtasidagi munosabatlar juda samimiy. Ular bir-biriga to‘liq ishonadi.
Bokschi shogirdlarning ustoziga bo‘lgan cheksiz hurmatini qadrlashini qo‘shimcha qildi.
Batafsil | Подробно | Read more... Daryo