Kimyo sohasidagi yirik olim, akademik Zokirjon Salimov vafot etdi

Kimyo sohasidagi yirik olim, O‘zbekiston Respublikasi Fanlar akademiyasi akademigi Zokirjon Salimov 75 yoshida vafot etdi, deya xabar bermoqda O‘zA.

Foto: O‘zA

Z.Salimov 1940-yili ishchi oilasida tug‘ildi. 1962-yili Toshkent politexnika instituti (hozirgi Toshkent davlat texnika universiteti)ni tugatib, mazkur oliy o‘quv yurtida aspiranturada tahsil oldi. 1967-yilda nomzodlik, 1976-yilda doktorlik dissertatsiyasini himoya qildi. 1987-yilda O‘zbekiston Respublikasi Fanlar akademiyasining a’zosi etib saylandi.
Iste’dodli olim o‘zining qariyb 50 yillik ilmiy-pedagogik faoliyati davomida Toshkent politexnika instituti katta o‘qituvchisi, dotsenti, professori, kafedra mudiri, Oliy va o‘rta maxsus ta’lim vaziri o‘rinbosari, O‘zbekiston Fanlar akademiyasi vitse-prezidenti, Kimyo instituti direktori, Umumiy va noorganik kimyo instituti rahbari kabi mas’ul lavozimlarda samarali mehnat qildi va O‘zbekistonda kimyo-texnologiya sohasidagi dolzarb ilmiy masalalarni tadqiq etish, yuqori malakali kadrlar tayyorlash ishiga munosib hissa qo‘shdi.
Z.Salimovning kimyoviy texnologiya jarayonlari va qurilmalari sohasining nazariy va amaliy masalalariga bag‘ishlangan darslik va o‘quv qo‘llanmalari, ko‘plab maqola va risolalari ilmiy jamoatchilikka yaxshi ma’lum. Ayniqsa, uning rahbarligida yaratilgan neft-gaz kondensati aralashmalarini suvsiz haydash texnologiyasi hozirgi kunda mamlakatimiz neftni qayta ishlash zavodlarida samarali qo‘llanayotganini ta’kidlash joiz.
Batafsil | Подробно | Read more... Daryo