Oldin Suleyman Kerimov, keyin Sergey Galitskiy yoqimtoyiga aylangan Odil Ahmedov Xitoyda 3 yil to‘p suradi

Xitoyning “Shanxay SIPG” futbol klubi bilan shartnoma imzolagan O‘zbekiston milliy terma jamoasi sardori Odil Ahmedov “Championat.asia” nashriga intervyu berdi .

Foto: Fut.uz

Suhbat davomida Ahmedov Shanxay klubini tanlashda Andre Villash-Boashning qo‘ng‘irog‘i muhim rol o‘ynaganini qayd etgan.
Ko‘plab jamoalardan takliflar tushdi. Uyda dam olayotganimda Villash-Boashning shaxsan o‘zi qo‘ng‘iroq qildi. Uni Rossiyadagi faoliyati orqali bilaman, kuchli deb hisoblayman. Meni jamoasida ko‘rishni istayotgani haqida aytdi. Futbolchi uchun esa murabbiyning ishonchi muhim. Demak, u bilan kelishib ishlay olaman.
Odil Ahmedov, “Shanxay SIPG” a’zosi
Odil Ahmedovning “Shanxay SIPG” bilan shartnomasi 3 yilga mo‘ljallangan.
Nafaqat Rossiyadan, Yevropaning boshqa mamlakatlaridan ham takliflar bor edi. “Krasnodar” talab qilgan summani esa faqatgina Xitoy klubi to‘lay oldi. Taklif qilingan shartnoma 3 yil ekani hammani qoniqtirdi.
Odil Ahmedov, “Shanxay SIPG” a’zosi
Odil Ahmedovning yangi jamoasida Braziliya terma jamoasi futbolchilari ham bor. Hujumki Xalk va yarim himoyachi Oskar Ahmedov bilan bir libosda harakat qiladi.
Ularning saviyasidagi yulduzlardan ko‘p narsa o‘rgansa bo‘ladi. Maydonda ham, uning tashqarisida ham. Bu mening omadim.
Odil Ahmedov, “Shanxay SIPG” a’zosi
Ahmedovning Rossiyadagi faoliyati qoniqarli bo‘ldi. U “Anji”da ham, “Krasnodar” safida ham qadrlandi.
“Anji”da Suleyman Kerimov, “Krasnodar”da Sergey Galitskiy menga hurmat ko‘zi bilan qaradi. Transfer amalga oshgach, Galitskiyning o‘zi qo‘ng‘iroq qildi va qarorimni hurmat qilishini aytdi, omad tiladi. U men bilan hamkorlik qilganidan mamnunligini yashirmadi. O‘zim ham Rossiyaning bu ikki klubidan minnatdorman.
Odil Ahmedov, “Shanxay SIPG” a’zosi
Odil Ahmedov Namanganda futbol maktabiga asos solgan. Bundan ko‘zlangan asosiy maqsad, viloyat futboli uchun Ahmedovdan kam bo‘lmagan bolalarni tarbiyalab berish.
Rejamdagi ishlarni qilishga tayyorman. Yaqin orada Namangan futbolini cho‘qqiga olib chiqishga harakat qilamiz. Bunga yana biroz vaqt kerak.
Odil Ahmedov, “Shanxay SIPG” a’zosi

Batafsil | Подробно | Read more... Daryo