Toshkent manzaralari: Qasddan qarama-qarshi qatnov qismiga chiqib, ko‘ngilxushlik qilgan haydovchi

Yangi yil oqshomida Toshkent ko‘chalaridan birida yo‘l harakati qoidalarini qo‘pol ravishda buzgan haydovchining Facebook’dagi “Voditeli Tashkenta (Drivers.uz)” guruhida e’lon qilingan videosi faol muhokamalar va keskin tanqidlarga sabab bo‘ldi.

Kadr: Facebook / “Voditeli Tashkenta (Drivers.uz)”

Videoda haydovchi Shota Rustaveli ko‘chasining Grand Mir mehmonxonasi va Geologiya muzeyi oralig‘idagi bo‘lagida yo‘lning qarama-qarshi qatnov qismiga chiqqani, yo‘l harakati qoidalarini qo‘pol ravishda buzgani va harakatning boshqa ishtirokchilari harakatiga jiddiy xalal bergani aks etgan.
Video haydovchining yonida bo‘lgan yo‘lovchilardan biri tomonidan olingan. U avtomobilni jazavaga tushgan holda, baqirib-baqirib haydagan. Video davomida yo‘lovchilar haydovchini tartibga chaqirishga uringani, ularning: “Bo‘ldi qil endi”, degan gaplarini ham eshitish mumkin.
Haydovchining shaxsi, avtomobil rusumi haqida aniq ma’lumotlar yo‘q. Foydalanuvchilarning yozishicha, qoidabuzar oq rangli Spark’ni boshqarayotgan bo‘lgan.
“Voditeli Tashkenta” guruhi a’zolari haydovchini keskin tanqid ostiga olgan, ba’zilar undan ochiqchasiga g‘azablangan (“Yo‘lidan biror ‘Kamaz’ chiqib, shunga urilganida, hech ham xafa bo‘lmasdim”, qabilidagi fikrlar ko‘plab bildirilgan).
Videoni e’lon qilgan foydalanuvchi unga shunday ta’rif bergan : “To‘qlikka sho‘xlik… Izoh o‘zingizdan”.



Ma’lumot uchun, Ma’muriy javobgarlik to‘g‘risidagi kodeksning 128-5-moddasi va 2-qismiga ko‘ra , haydovchilarning yo‘lning qarama-qarshi harakatlanish uchun mo‘ljallangan tomoniga yoki bo‘lagiga yo‘l harakati qoidalarini buzgan holda chiqishi, xuddi shuningdek avariya holati yuzaga kelishiga sabab bo‘lgan, ya’ni yo‘l harakatining boshqa qatnashchilarini tezlikni, harakat yo‘nalishini keskin o‘zgartirishga yoki o‘z xavfsizligini yohud boshqa fuqarolarning xavfsizligini ta’minlash uchun o‘zga choralarni ko‘rishga majbur qiluvchi huquqbuzarlikni sodir etishi eng kam ish haqining o‘n baravari (5-yanvar holatiga ko‘ra — 1 497 750 so‘m) miqdorida jarima solinishiga sabab bo‘ladi.
Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ” ( @toshqindaryo )ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo